كتبت - أماني موسى
أعرب الرئيس عبد الفتاح السيسى على هامش افتتاح 39 مشروعًا تنمويًا جديدًا، أمس الأحد، عن خالص اعتذاره لجموع المحامين عن التصرف الفردى الذى صدر من أحد ضباط الشرطة ضد أحد المحامين الأسبوع الماضى، قائلاً: "أنا بقول للمحامين كلهم حقكم علي، وأنا أعتذر لكم، وبقول لكل أجهزة الدولة من فضلكم لازم نخلى بالنا من كل حاجة، رغم الظروف اللى إحنا فيها"، موجهًا كلامه للواء مجدى عبد الغفار وزير الداخلية.

 

وأضاف: أنا أعتذر لكل مواطن مصري تعرض لأى إساءة بإعتبارى مسئول مسئولية مباشرة عن أى شىء يحصل للمواطن المصرى، وبقول لأولادنا فى الشرطة أو فى أى مصلحة حكومية  لازم ينتبهوا إنهم بيتعاملوا مع بشر والوظيفة تفرض عليهم التحمل لأن المصريين أهلنا وناسنا ومافيش حد ينفع يقسوا على أهله".
 

وقال: عاوزين نأخد بالنا دايمًا ونكون مثل وقدوة، واستشهد الرئيس بما حدث خلال زيارته الأخيرة لألمانيا والمجر بالقول : كانت تعليمات الحرس بضرورة عدم الاقتراب من أحد أو التوقف من أجل أحد ولكن أنا كسرت هذه التعليمات وأديت أوامر بعكسها لأن المواطن المصرى اللى مكلف نفسه وسايب شغله وحالة عشان يقول أنا معاكم مش ممكن أبدًا أقوله أمشى متشكرين لأنهم أهلى وناسى وما ينفعش حد يقسوا على أهله وناسه، إحنا لازم نرفق على بعضنا".