بقلم:أبانوب مرجان | الاثنين ١٧ اغسطس ٢٠١٥ -
٠٢:
٠٩ م +02:00 EET
أبانوب مرجان
هيجيي عليك وقت وتتخنق من حياتك الروتينية، هتاخد قرار أنك لازك تكون اجتماعي أكتر من كدة، وأنك لازم ترفض كل الأحكام الوضعية إللي إنت لامؤاحذة حطيتها لنفسك!
هتشوف ناس كتير، من بين كل مجموعة كدابة هتلاقي واحد بجد، هتقرب منه، هتبقوا صحاب، يقول لك على إللي فيه، وتقول له على إللي فيك، ييجي البديل يبعد!!
وواحد على واحد، وجرح على جرح، هتلاقي نفسك مع الوقت محقق دكتوراه حلوة في الوجع، أصلك اتعودت.
في الأول ممكن تتعب، بعدين عادي أنه يصعب عليك، وبعدين هتعيش بالمُسكن إللي اسمه "عادي مفيش حاجة".. هيروح مفعول المُسكن ترجع تتعب.. بعدين يصعب عليك وإلخ!
هتلاقي ناس أنت بتعمل لهم كل حاجة حلوة، بتييجي على نفسك عشان فرحتهم، بتحلم تشوفهم مبسوطين، بتخطط عشان تفاجئهم بحاجة حلوة، وبعدين ييجي البديل.. فيمشوا فأنت تتعب، بعدين يصعب عليك، بعدين ما تنساش تعيش على "المُسكن".
الناس دي مش وحشة ولا حاجة، أنت بس إللي عبيط حبتين، لسه بتحب وأنت على مشارف 2016، ده أنت تعبان مُلا!
أحسن حاجة تعمل بالمقولة إللي بتقول: "ابعد عنهم وسيب الحيطة عليهم تميل"..
أصلك لازم تبعد، لازم ترجع تعيش بالأحكام إللي هما فرضوها، لازم تسيب كل واحد لضميره؛ لأن ببساطة كل واحد غلط عارف هو غلط في أيه بالظبط، وعارف أنك تعبان، وعارف أنك صعبان عليك، ومتأكد أنك أكيد عايش على المُسكن!
نقلا عن vetogate.com
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
English
