مشاكل هتقابليها لو انتي بنت اجتماعية في مصر

طبعاً انك تكونى اجتماعية و شخصية مُقبلة على الحياه و معارفها كتير فى أى حتة فى الدنيا مش حاجة وحشة خالص بالعكس، لكن فى مصر اجتماعية بتتفسر احياناً كتير بمعنى تانى، انك ” شمال ” و محدش عارف يحكُمك.. و مش عشان احنا داخلين على ٢٠١٨ هيكون الوضع اتحسن و مخنا اتفتح، بالعكس دة الموضوع ممكن يكون بيبقى اسوأ مع الوقت .. عشان للأسف احنا بنرجع لورا مش بنطلع لقدام.

١- واقعة


انك تكونى بتتعاملى مع كل صحابك الولاد بطريقة لطيفة بتستجدعى معاهم، بتهتمى، و تضحكى و تهزرى و تُخرجى و ترغى م الاخر بتتعاملى بطبيعتك، احياناً بيدى لكل واحد فيهم انطباع انك خلاص واقعة و بتحبيه، و بياخد المعاملة انها خاصة ليه هو بس، مع انك بتتعاملى كدة بطبيعتك مع كل خلق الله يعنى، بس ازاى ميصحش ما هو رشدى اباظة اصله !

٢- السهر


لو انتى بنت اهلها مدينها قدر من الحرية انك ترجعى متأخر و واثقين فيكى دة بيتصنف عند شوية من اللى حواليكى انه سيبان و قلة تربية طبعاً و انك انتى و اهلك متعرفوش ربنا اصلاً، اصل ازاى مثلاً سهرانة مع صحابك بتشربوا حاجة فى مكان بترغوا و تضحكوا و تستمتعوا بوقتكوا كشباب عادى موراهمش أزمة فيضان نهر النيل بيحلوها، و المصيبة إن ممكن صحابك الولاد نفسهم يزغرولك الزغرة دى بتاعت ” هو بابا فين يا لينا؟ ” لا هو بابا مربينى بس يا عماد.

٣- القهوة


رغم إن نسبياً الموضوع بدأ يكون عادى شوية إن بنت تقعد على قهوة ما انتوا قاعدين عليها ليل نهار محدش بيكلمكوا جت علينا يعنى؟ لكن لسة برضو فيه ناس بالنسبالها قعدة البنت ع القهاوى دى من الكبائر سعادتك، و ساعات بتحسى انك بتقوليها كدة و انتى حاطة ايدك على قلبك لا حد يفهمك غلط مع انك والله بتقعدى عادى تشربى شاى بلبن عشان مصروف الشهر خلص و مفاضلش غير ١٥ جنيه يعنى.

4- الشتيمة


خلينا متفقين إن الشتيمة غلط و حرام على كل المخلوقات بنت ولد بطريق حتى هتفضل حاجة غلط و مؤذية للشخص اللى بتتوجهله، لكن مفيش دين أو شرع فى الدنيا قال إن البنت اللى بتشتم غلطانة و متربتش و الولد متعصب و مقدرش يتحكم فى اعصابه عادى، أو دة هزار الولاد عادى لكن البنات متهزرش بشتيمة، لكن البنت اللى فاكة و بتهزر بشتيمة مش شمال الا لو بتعتبروا الولد اللى بيشتم صحابه بهزار شمال.

٥- شرطة الأخلاق بتقولك خدى بالك من لبسك


طبعاً كلنا عارفين إن المفروض البنت قبل ما تلبس لبس معين تنزل الأول و تطلب تقييم الشباب عشان منتهى قلة الأدب انها تلبس مثلاً مايوه أو هوت شورت و هى بتصيف مع اهلها – اللى مربوهاش و متربوش اكيد -، أو فستان مفتوح أو قصير، عشان الناس اللى ملهاش أى لازمة فحياتها مش عاجبهم اللبس و طبعاً هى جت الدنيا عشان رضاهم اهم من رضا بابا و ماما و جدو و الأستاذ محمد صبحى.

٦- ركبى الوش الخشب ٢٤ ساعة


الابتسامة زمان كانت صدقة الحقيقة لكن دلوقتى لو ابتسمتى فى وش حد متعرفيهوش، أو اتعاملتى بشكل لطيف و متواضع مع أى عامل أو جرسون فى مطعم ٨٠٪‏ هيحاول يشقطك عشان هو بالنسباله مفيش حاجة اسمها بنت اجتماعية كدة و على سجيتها، لازم ترسم الوش التنك و تتعامل بطريقة تكرهك فى عيشتك، اصل لو غير كدة يبقى اكيد انتى مش تمام يعنى ملهاش حل تانى، و اتنكتى برضو هتطلعى نافشة ريشك على مفيش و فاكرة نفسك حاجة، فى الحالتين انتى غلط يعنى  !

٧- بتحكى لأهلك كل حاجة


إنك تكونى متربية إن اهلك صحابك بتحكيلهم كل حاجة بتعمليها و بمزاجك مش اجبار منهم مهما كانت صح أو غلط، دة المفروض إنه بيسكت اللى حواليكى إنك مبتعمليش حاجة غلط لكن للأسف احياناً كتير مش دة اللى بيحصل و لما بتحكى لحد من صحابك إنك حاكية لأهلك حاجة تخص ولد بتحبيه أو إنك عملتى حاجة غلط و ندمتى و حكيتلهم، دة بيخلى البعض يشوفك سايبة اكتر، و اهلك مطاوعينك على كدة و موافقين، و بيحولك فى نظرهم من واحدة حُرة مبتعملش حاجة تخاف منها لواحدة بجحة و بتتباهى بالغلط.

طبعاً الكلام دة مش تعميم، لسة فيه ناس فى حالها مبتحاولش تفهم حد غلط ولا تفرض على حد اسلوب حياه و تديله كتالوج ازاى يعيش حياته الشخصية، و لسة فيه ناس بتحترم البنت المتفتحة و شايفاها شخص كويس و محترم، رغم إن حتى نظرته لو كانت عكس كدة مش هتقلل منها فى حاجة برضو، لكنه بيحترم نفسه عشان كدة قادر يحترم اللى حواليه… و للبنت الاجتماعية اللى مش عايزة تصطنع شخصية مش بتاعتها، خليكى زى ما انتى و متخليش حد يغيرك لشخص انتى مش عايزاه، عادى هتحاربى بس هتخرجى من الحرب دى أقوى من الأول و خليكى مؤمنة انك انتى اللى صح مهما قالوا.
نقلا عن صوت العلمانية