#ثقافة_فيها_لأخفيها

 

النجاح له ألف أب و دايما بيغيظ الغير

 

حاجة غريبة جدا بصراحة 

مؤخراً ظهر شاب اسمه "خضر " .. شاب طموح و ذكي و عنده موهبة خاصة في الاداء عموما وربما اشياء اخرى و هذا جميل 

لكن الحقيقة خسارته الحقيقية و اللي حتخسره عموما كتير في حياته هي العند الدكر ده و شغل العافية و الكيد 

و ثقافة فيها لاخفيها 

خضر مفكر ان #مهرجان_الجونة اختراع

و انه جاب التايهة و انه اخترع العجلة او الدراجة الحربية مثلا او التليفون او البنسلين او اختراع جديد لعلاج السرطان 

ساعتها بس كنا شيلناه على اكتفنا و لفينا بيه الكوكب 

و اعتقاده ده -بانه جاب الديب من ديله- هو المصيبة في حد ذاتها و ده تقريبا كان رد السيد #نجيب_ساويرس عليه لكن لجان السيد خضر الالكترونيةو اللي اصبح للاسف موتور مش لادد عليها رد ساويرس و عاملين حملة ضد المهرجان !! 

طيب هو لما حد يحلم حلم " على حد تعبيره " و يلاقي حلمه واقع اتحقق ..المفروض يفرح و لا يتقهر و يسيب البلد من قهرته ؟؟!

هو يا فيها يا اخفيها ؟؟!!!

هو السيد خضر مثلا عاوز الشباك اللي بنطل بيه ع الثقافة و السينما ده يتقفل

و اقصد بهذه النافذة " مهرجان الجونة " المشرف لمصر كلها بل و للشرق الاوسط و أفريقيا و اللي نشط العقول و الافئدة و السياحة في مصر و اشياء اخرى 

لو كل ده راح .. السيد خضر حيتحزم و يرقص في الشارع ؟!

ساعتها حيبقى هو اللي بيصطف مع ياسر برهامي و عاصم عبد الماجد !!!

هم دول اللي بيكرهوا الفن و عاوزين ينسفوه 

ازاي فنان يكره الفن و انه يكون فيه مهرجان فني بالمستوى ده في بلده 

حيقول لي حقي .. هو حقك ان المهرجان يقف ؟؟!! 

لو حقك فلوس طالب بيها من خلال القضاء

و انت بنفسك معترف ان القانون لا يحمي المغفلين 

كللنا اتضحك علينا و كتيييير يا سيد خضر و كللنا كنا هذا المغفل في مواقف عديدة مختلفة .. و المغفل عموما شخص مخطىء و اديه بيتعلم بس مش يعلم على مهرجان ناجح لانه منكاد !!

و السيد الانف الذكر كمان معترف في الفيديو بتاعه انه شريك صعب و عنيد و برج الثور .. طيب مش يمكن الصفات ده كلها هي السبب وراء كل اللي حصل لك و اللي ممكن يحصل لك لانك بتنفر الناس منك اما بتتعامل معاهم بغشامة او فوقية زي ما قيل لك و انه شعروا انك لا تطاق و لا يمكن الاشتراك معك في شيء ؟؟ 

حضرته كمان معترف ان شركاؤه قالوله وش احنا مش عارفين نتعامل معاك و حتكون شريك صامت لانك بتبوظ لنا الدنيا 

كل ده لم يجعله بستشعر انه يا يغير طريقته يا حيمشي لان الناس مش حتعرف تشتغل مع فريق غير متجانس

#بشرى و الاخرين كانوا أذكياء و عندهم فطنة ان #آل _ساويرس مش حيتحمسوا الا اما يكون #عمرو_منسي في الموضوع 

و انه عمرو منسي هو الاساسي .. و ما حكم في ماله ما ظلم 

الممولين عاوزين عمرو 

هما بقى قدروا على اللي حضرتك ما اقدرتش عليه .. هم. قدروا يوفقوا أوضاعهم مع السيد عمرو اللي انت استفزيته و هو الحصان الرابح فحضرتك ببساطة اتنطرت و فضوا معاك الشركة 

و ده العادي على فكرة .. غير المتجانس و الشريك المخالف هو دايما اللي لازم يرحل في سلام 

اما الغاغة البلدي المعمولة ده ع السوشال ميديا و اللي عمرها الافتراضي ٤٨ ساعة بكتيره مالهاش عازه في ظني 

حقك يا سيد خضر يرجع بالقانون لا غير 

مش بالرغبة في هد المعبد على طريقة شمشون و نيرون و اللي حيصفى عليه الامر في النهاية انه حيفضل لوحده 

عايش مع لجانه الالكترونية في العالم الافتراضي و الكل حيخاف يتعامل معاه او يشاركه في حاجة في الواقع مهما كان عبقري 

عشان الفجر في الخصام و الجرصة ده مش حلوة

و عشان كمان الغل و الكيد و حالة الوتر ده حيخلوك اكتر حد يستحق الشفقة 

ربنا يهدي ..