واقعة تنمر خطيرة في الإسكندرية ضد طفل أسمر البشرة

تداول عدد من النشطاء على موقع التواصل الاجتماعي "فيسبوك"، واقعة تنمر خطيرة حدثت في الإسكندرية، حيث قام طفل بدفع طفل أخر -ذو بشرة سمراء- على قضبان "الترام".

 

وقال منشور متداول بين رواد مواقع التواصل الاجتماعي إن الطفل "مكاكو أنجلو" من جنوب السودان وعايش معانا في الأسكندرية.. ومن أسبوع بالضبط، الأربعاء ١٩ ديسمبر ٢٠١٨، وهو خارج من مدرسته مروح بيته، وهو بيعدي شريط الترام(التورماي) 🚋 ، كان فيه ترام داخل المحطة، فوقف فوق الرصيف مستنيه يعدي، لكن كان فيه عيل مجرم، ليه رأي تاني، عمل في (مكاكو) إيه؟! زقه ورماه قدام الترام!!! ليه؟! مكانش عاجبه لون بشرة مكاكو!".

 

وأضاف: "وقع مكاكو على القضبان، ولكن السائق الحكيم وقف بسرعة قبل ما يعدي ويدوس فوق مكاكو.. وقع مكاكو فوق القضبان، على صدره بكل قوة!.. والحق يقال، عم (محمد) السواق مش بس وقف الترام قبل ما يدوس على مكاكو، لكنه قبض على المجرم، واتحفظ عليه لحد ما المباحث جت!.. مكاكو دلوقتي في العناية المركزة، يعاني من تهتك ومياة على الرئتين، وتجمع دموي في الكبد (اتحسن بعد عملية دقيقة)، واشتباه بكدمات شديدة في العامود الفقري!".

 

وتم نشر صورة للطفل من المستشفى وقال المنشور: "مكاكو وهو بيصلي عشان ربنا يشفيه، ويغفر للولد اللي زقه!".