مع النضج

أحد أهم دروس الحياة اللي بنكتسبها مع الوقت والنضج وأنت ماشي في طريق الحياة.. بتعرف أن الحياة طريق ورحلة ممكن تطول أو تقصر بس بالنهاية هي مرة واحدة وأنت مش عارف الرحلة دي هتنتهي أمتى عشان كدة مهم أنك تستمتع بكل لحظة فيها، بكل أحداثها حتى الوحشة منها، لأنها زي ما بتعلم علينا كمان بتعلمنا، قيمة الحياة وقيمة الناس الحلوة اللي فيها.

 

لما باب يتقفل في وشك ولا يتداس على صوباعك.. بص للباب اللي اتقفل ومتفكرش كتير أو تنتظر، ابتسم وافرح وانطلق في طريق حياتك وكمل جري في طريقك وحقق أهدافك اللي أنت محددها.. الحياة أقصر من أنك تضيعها عند باب مقفول ولا موارب .

 

الحياة أجمل وأحلى وأهم من أنك تضيعها قدام علاقة انتهت أو فشلت، أو قرايب أو ناس خذلوك، أو ناس قدمت لهم خير وردوه شر وغدر، أو صدمات وخيبات اتعرضت لها.

 

زي ما دول في الحياة .. في كمان الجانب الحلو والمشرق.. أنت اللي بتقرر هتبص إزاي وبناء على نظرتك دي هتكون حياتك.

 

افرح واستمتع بالتفاصيل الصغيرة، ركز أوي عاللي عندك وافرح وانبسط بيه وأمتن أنك بتملكه لأنه عطية ومنحة إلهية مش حق مكتسب، بدل التركيز عاللي ناقص ومش عندك.. هي الحياة كدة بتدي حاجات وتاخد حاجات، وأنت لازم تقبل بدة.

 

أنت اللي بتختار هتبص لحياتك إزاي.. يا هتقرر تفرح وتنبسط وتنجز وتستمتع باللي في إيدك ، يا تفضل باصص للي مش بتملكه أو اللي ضاع منك أو اللي أذوك أو اللي ردو خيرك بإساءة و و ، وتفضل شايفها سودا ومتحسش بالحلو اللي فيها.

 

الحياة حلوة بتحدياتها وأزماتها وأوقاتها الحلوة والإنجازات.. لولا الفقد والوقت الصعب مش هتعرف وتدرك قيمة التعويض أو أوقات الرخاء والفرح.

 

الصدمات بتفيدك وتبنيك وتخليك أقوى وأصلب في مواجهة الحياة، بتخليك أقل عشم، أقل توقعات "شخص واقعي" أقل زعل عاللي يروح، أقل تعلق بالأشخاص والأشياء، وفي نفس الوقت شخص بيقدر قيمة كل حاجة حلوة وحقيقية في حياته حتى لو كانت صغيرة، أقل تشبث بحاجات متستاهلش وأكثر إدراك للحاجات والأشخاص اللي يستاهلوا، مش هترهق نفسك في معارك خاسرة لكسب حاجات متستاهلش انك تحارب عشانها، هتبقى عارف أكتر إيه اللي يستحق مجهودك وطاقتك ويبقى معركة تستحق التعب.

 

وأنت بالطريق لما تتكعبل قوم ونفض هدومك بسرعة وكمل جري، متفضلش واقع بمكانك وإلا هيداس عليك والحياة هتكمل مسيرتها وأنت بس اللي هتقف في مكانك.