د. أمير فهمى زخارى
- لحل مشكله النمل:
* شويه خل تفاح مع مايه مغليه ورشي مناطق التجمع بتاع المنبع..
* لمنع تسلل النمل الي السكر اضيفي معه عودين من القرنفل.
- قشر الليمون ده ممكن تعملي منه كذا حاجه:
* ممكن يتخلل
* او اغليه فى شويه ميه وأضيفى اليه صابون المواعين وأغسلى بيه السيراميك،
* او انقعى فيه الملابس البيضاء،
* او حطي عليه شوية خل وتغسلي بيه عيون البوتجاز...
- قلب البتنجان اللى بتقوريه شوحيه فى معلقه زيت واضربيه مع فلفل اخضر ومعلقتين زبادى وطحينه ومعلقة مايونيز وشوية بقدونس واعمليه بابا غنوج.
- الرز الباقى ممكن تعمليه رز معمر مع قطعتين لحمه او ربع فرخه ولبن ودخليه الفرن
او تشليه لما تعملى كشرى او تفرميه مع الكفته.
- المكرونه الباقيه حطيها فى الفريزر وفى اى يوم طلعيها فى صنيه وعليها معلقه صلصه ع الوش ودخليها الفرن وجنبها بطاطس محمره وسلطه.
- بواقى الجبنه اللى بتنشف اضربيها فى الكبه مع معلقه قشطه هتبقى جبنه كريمى ومع طماطم او فلفل اخضر او زيتون.
- لما يجي موسم الخس ده هاتيه وتنظيفه ومتغسلهوش عشان ميسودش لفية فوطة ولماتحبى تاكليه تطلعيه وانقعيه بماء وخل كأنه طازة.
- عايزة تشربى شاى مظبوط هاتى برطمان ازاز وتلخبطى كم نوع على بعض بيدى لون وطعم خرافة.
- قشر البرتقال واليوسفى بيتحط فى المش بيديله طعم جميل.
- العيش الفينو قبل ما تعمليه سندوتشات شيلي القلب واقطعي الحروف وحمصيهم واطحنيهم وضيفي عليهم توم وبصل بودر وبابريكا وملح وفلفل اسود ونشا وبيكنج بودر وهيبقا عندك احلي فيجيتار مقرمش للبانيه والفراخ.
- البطاطس قبل ما تحمريها اسلقيها عشر دقايق ف ميه وملح هتلاقيها بتقرمش ومش هتشرب زيت.
- ضيفي معلقه صغيره بيكنج بودر ف الشوربه اللي هتسقي بيها الرقاق باللحمه هيبقي مورق ومقرمش معاكي.
- ادهني الفراخ والبط واي طيور عمومآ ب (كاتشب وملح وفلفل وقرفة) قبل ما تدخليها الفرن.
- املأي الملاحة بالملح وضع معه القليل من الرز والعكس لو عندك كميات من الارز اضيفي اليه الملح في أيام الحر والرطوبة؛ حتى تضمن عدم تجمده..
- للتخلص من رائحة الخلاط وتنظيفه بسهولة، قومي بوضع كمية من الماء الدافئ وعصير الليمون والملح وصابون الأطباق السائل به، ثم أخفقي المزيج بالخلاط لمدة دقيقة.
قومي بغسله بعد ذلك بالماء والصابون السائل وستجديه نظيف تماماً ولا يوجد به أي روائح عالقة.
وللمقال بقيه...تحياتى.
