بتحبوا فيها إيه؟

جورج المصري

سؤال ملهوش جواب، سئلت الكثير من المصريين داخل وخارج مصر بتحب إيه في مصر؟

سؤال مش المفروض انه يوم يكون سؤال محير أو سؤال معقد. ولكن ما من واحد سألته السؤال ده إلا وجاوبني بإجابات لا تمت للسؤال بصله يعني مثلا:

جوها جميل بس ملوث، مياهها عذبه بس ملوثه، شعبها طيب بس مطحون و، الفاكهة لها طعم بس ملوثه، خضرواتها لذيذه بس ملوثه، اللحمة طعمها يجنن بس غالية نار وملوثه، الفُسح كثيرة بس غالية نار ومش لكل الناس، الشعب متدين بس السرقات و النصب و الاحتيال و جرائم الشرف و الاعتداء علي الإناث في ارتفاع مستمر. و إلي هنا اسأل السؤال التالي طب بتحبها بعد كل ده ليه وعلشان إيه؟ و الرد ما هي بلدي ولازم أحبها.

والسؤال اللي بعده بيكون سؤال محير وصعب وفي بعض الأحيان سؤال استفزازي حسب الشخص اللي بسئله السؤال.

لما أنت بتحب مصر علي الرغم من كل السلبيات السابقة باتري المحبوبة مصر أخذت منك إيه ؟ عملت لها إيه ؟ يقول الواحد منهم اخويا وأبويا وأبن عمي استشهدوا في حروب مصر مع إسرائيل عظيم طب ما هم راحوا الحرب غصب عنهم لان التجنيد إجباري وكل واحد يقدر يفلت من التجنيد بواسطة أو بعاهة ما يصدق ويفلت؟ أنت عاوز تقولي إن كل اللي اتجندوا في الجيش دخلوا الجيش علشان يدافعوا عن مصر ؟ طب يا سيدي ماشي وان فرضنا جدلا إن ده حقيقي لخمسين بالمائه من المجندين طب ال الباقي يا تري بيحب مصر ليه وقدم لها إيه ؟

من فيكم بيروح شغله الصبح وبيقول في نفسه النهارده أنا رايح اخدم حبيبتي مصر من قلبي ؟ مين فيكم بيروح المدرسة وبيقول أنا بتعلم علشان انفع بلدي مين فيكم بيروح الجامعة وهو بيفكر انه يخدم بلده أذاي ؟

يا تري فيه سواق تاكسي واحد بيطلع من بيتهم وهو بيفكر انه يطلع يخدم أولاد بلده اللي محتاجين توصيله العيان والا اللي رايح شغله ويقول في نفسه أنا النهارده حكون بشوش وأعامل الزباين معامله طيبه اخفف عليهم وهما يخففوا علي.

يا تري سواق الأتوبيس ولا الدكتور وهو بيشوف الزبائن بيشوفهم علي أنهم بلاوي بتتحدف عليه ولازم يوصلهم غصب عن عينه علشان يرجع بالأتوبيس مكسر من طلوعه فوق الأرصفة وهو محمل الركاب علشان يتخطى اللي قدامه، يا عالم، يا تري الدكتور من دول بيشوف المريض علي انه جنيه ولا بيشوفه علي انه إنسان محتاج للرعاية الطبية ؟ ولا دكاترة اليومين دول إما مفلسين علشان ملهمش حظ أو من كثر الفلوس بقوا صعرانين.

بتحبوا مصر علشان إيه؟ وقدمتولها إيه؟ كل واحد بيجري بس يلحق قبل أخوه وبعد كده تشتكوا من العالم بقي صعران ؟ هو العالم بالنسبة لك مش هو أنت برضه العالم لغيرك . إن كنت شايف الناس بقت صعرانه طب مأنت منهم بس مش شايف نفسك. 

يا عالم إن حبيت مصر فلازم تحب أخوك في الوطن أخوك في العائلة الكبيرة وأخوك يحبك وتساعدوا بعض تتخطوا الصعاب مش أنت اللي تحفر الخنادق و المطبات وترجع تقول الشعب بقي شعب صعران ؟ ارحموا الغير منكم أولا علشان يرحمكم الغير. دا المثل بيقول تلف وتدور و اللي تعمله يرجعلك .

بتحبوا مصر ليه؟ هو الحب كلام كأشعار وأغاني كلام في الهوا ملهوش لا معني ولا طعم ولا ريحه. آه يا ليل يا عين وهي دي مصر اللي بتحبوها.

صحيح يا مصر خيرك لغيرك وولادك هما أعدائك. ولو حبينا نجيب حد يخربك مش حنلاقي حد يخربها أحسن من اللي بيقولوا إنهم بيحبوكي وبالروح والدم يفدوكي. صحيح يفدوكي بروح حد تاني بس لما تيجي لغاية عندهم يا روح ما بعدك روح ويا دمي ما بعدك دم. ده إن كان من الأساس فيه دم.