فلنتحاور مع د. مفيد شهاب

الراسل: Sunrays
فلنحاور الدكتور مفيد شهاب فيما قال بشيء من الاحترام كونه رجل مسئول في حكومتنا الرشيدة.
1 - هل يصح يا دكتور شهاب التصريح بهذا القول؟؟ 500 كنيسة في 100 سنة يعني بمعدل 5 كنائس في العام، فهل معدل الزيادة في السكان من المسيحيين منخفضة إلى هذا الحد؟؟
2 - هل سعادتك ناسي أن اللجوء للمقارنة يا دكتور قد يدفع البعض أن يسأل سيادتك فيقول: كم مسجدًا وكم زاوية تم إنشاءها في هذه الـ100 سنة؟؟ وهكذا ندخل في عمليات المقارنة والفرز الطائفي، وبعدين يجي البعض ويلوم الأقباط ويقول عليهم أنهم يثيرون فتنة طائفية؟؟ طيب أنا راضي زمتك، بزمتك يا دكتور كلام مين اللي ممكن يثير فتنه طائفية؟؟ اللي معاليك بيقوله والا اللي بيقولوه السادة المعلقين؟
عيب يا دكتور وأنت راجل متعلم وأستاذ جامعة يعني تملك منهج تفكير، مش كده وبس دة أنت يا راجل كنت عضو في منظمة الشباب يعني تملك حس سياسي يخليك تحسس على الكلام اللي بتقوله قبل ما تنطق بيه.

3 - لماذا يحتاج المصري المسيحي يا دكتور لترخيص أو قرار جمهوري لبناء أو ترميم دار عبادته بينما أخوه المسلم لا يحتاج إلى ذلك؟؟ أوعى تقول لأن المسيحي ذمي والدولة إسلامية لأن مثل هذا الكلام لا محل له في مفهوم الوطن والمواطنة، كمان مش ح نفضل على طول في هذا الموال لأن الدنيا حوالينا بتتغير ومش معقول نفضل إحنا متربسين عند القديم إياه اللي ولي زمانه واللا عايزنا نرجع نركب الحمير والجمال وبلاش مترو أنفاق.
4 - حضرتك بتقول يا دكتور أن دور العبادة تخضع لمعايير وإجراءات وضمانات معينة لابد من توافرها قبل إعطاء ترخيص ببنائها. وإحنا كمواطنين بنسأل معاليك يا ترى المعايير والإجراءات والضمانات المعينة اللي لابد من توافرها قبل إعطاء الترخيص دي قاصرة على دور العبادة بتاعة المواطنين المسيحيين بس واللا مطلوبة من الجميع؟؟
ثم أنه معاليك لم تتفضل وتفسر لينا إيه نوع المعايير والضمانات المطلوبة... بس أوعى تقول شروط العزبي باشا اللي كان معمول بيها أيام ما كانت مصر محتلة من الأتراك والمماليك والإنجليز، واللا إيه معنى الاستقلال يا دكتور؟؟ مش كلنا برضك كنا محتلين واللا الاحتلال دة كان للأقباط وبس ومحصلهمش استقلال ليهم لغاية دلوقتي وأن الاستقلال اللي حصل دة كان للمسلمين وبس؟؟

5 - وبعدين سعادتك في تصريحاتك بتقول عن قانون البناء الموحد لدور العبادة المطروح بقوة منذ أربع سنوات -حسب التصريح المنقول عن سعادتك- أن هناك قانون معمول به منذ سنوات وحتى الآن لتنظيم بناء دور العبادة... وأننا ندرس كل المقترحات لخروج قانون متكامل يرضى الجميع أو الاحتفاظ بالقانون الحالي (لصلاحيته كونه يتعامل مع الأمور بواقعية شديدة)!
أنهي قانون حالي اللي بتشير إليه سعادتك وتقول عليه.. لصلاحيته كونه يتعامل مع الأمور بواقعيه شديدة؟؟
هل هو الخط الهمايوني؟؟ طيب أنا راضي زمتكم أيها السادة ممن سوف يطالعون هذا التعليق هل هناك كلام غير دة نرد بيه علي الدكتور شهاب؟؟ طب مين يقوم بالرد على ما أدلى به د. مفيد شهاب بأسلوب غير كدة؟؟... مع تحياتي لجميعكم وخالص مودتي. 
على موضوع:قانون دور العبادة الموحد وصمة عار في جبين الوطن