بقلم الشاعر: عبد الحميد بدوي
الإخوان عايزين إية وعاملين قلقل وعايزين يحرقوا البلد ومش راضيين يسكتوا لحد دلوقتى ليه ؟؟؟؟
طيب أنا راضى ضميركم مرسى يستاهل أن حد فى الدنيا يزعل عليه طيب اللى هايزعل هايزعل ليه ؟؟؟؟؟؟
هو كان مين بيحبه غير اهله وعشيرته وجماعته طيب هما احرار فيه خليهم يشبعوا بيه أنا مش عارف ليه الاخوان حتى الان عندها أقتناع وايمان أن مرسى راجع أنا عايز أعرف هايرجع أزاى يا ولاد الحلال هو مرسى كان بيحكم أصلا عشان يرجع مرسى كان عايش فى التوهان.
وياريت تصحوا بقى من الغيبوبة أنتم كمان والله لو الاخوان بتحب البلد بجد تعمل فرح أحنا يا جماعة عايزين رئيس بجد مش ضيف شرف الناس جابت أخرها فى سنة بلاش قرف يا جماعة لو حد عارف أن مرسى عمل حاجة للبلد وأحنا مش وخدين بالنا يقول على طول أنتم مداريين ليه ؟؟؟
الجماعة هاتموت نفسها عليه ؟ وبيقولك يا النصر يا الشهادة واللى كتب وصيته واللى بكلمه بيقول أنتم بتعبدوا البيادة أستغفر الله العظيم هى الناس كرهتكم من شوية بجد بزيادة والف سلامة للمرشد ولاصحاب السيادة ورجال المنصةوالقيادة طيب أنا عندى سؤال أنتم لما كنتم فى الحكم عملتوا أية ؟؟؟؟ للمواطن الفقير والغلبان غير أن الفقير بقى أفقر مما كان كل اللى عمله مرسى أنه خلى الناس تترحم على أيام مبارك وتقول دا كان وكان وكفروا بالثورة والثوار وجايين دلوقتى انتم تتكلموا عن الحرية والاحرار مش دوركم خالص ولا حتى كان دوركم زمان طول عمركم بتتكيفوا فى اى وضع كيف ما كان أنا مش عارف أنتم مكبرين الموضوع كدا ليه ولسه بيقولك يكمل مدته طيب يكمل ليه وهو قضى على نفسه بنفسه وكره الناس حتى فى شكله وأسمه هو أنتم نسيتوا جملة الله يخرب بيتك يا مرسى طيب والله العظيم سنة كتير قوى قوى عليه اومال انتم فاكرين اية ؟؟؟؟
أنتم عملتوا فى نفسكم اللى ماعملوش حد أنتم اثبتوا للعالم أنكم أغبى مخلوقات ع الارض ومش شاطرين الا فى المكبرة والكدب والعند وكأن مفيش حاجة عندكم اسمها عقل ياريت ترتحتوا شوية وبلاش وجع قلب أمتى هاتفهموا أن الناس معدش عندها صبر كان الاول أجهزة الدولة بس ضدكم دلوقتى بقت كل اطياف الشعب وكأن مكتوب عليكم تعيشوا في الغلب بس المرة دى بسببكم مش بسبب أي حد .
