بقلم: مينا ملاك عازر
على إثر إعلان البرادعي عن استعداده لترشيح نفسه في انتخابات الرئاسة المصرية، استل الصحفيون الحكوميون أقلامهم وشرعوا يشحذونٍ أذهانهم لكي يبحثوا للرجل عن أخطاء ويسطرون بها أوراقهم، وبدأوا يكيلون له الاتهامات ومن بين هذه الاتهامات اتهام خطير لأبعد الحدود اتهام إذا ثبت من شأنه يكبل الرجل ويلقي به في أودة الفئران بعد دهنه بالعسل ثم نخرجه ليجري ورائه كلاب جعانة ثم نلقي به في جب مليء بالأسود التي لم ترى اللحم منذ قرون حتى تفتك به!!
وإن كانت الأخيرة خسارة فيه لأنه سيموت ولكن الذي يقترف مثل هذا الجرم لا يستحق الموت بل يستحق أن يتمنى الموت ويشتهيه ولا يصل له.

فُتّكُم في الكلام ونسيت أقول لكم الاتهام، آسف ما تزعلشي يا عم إستنى ثواني وسأقول لك ما تبُصِّش هنا ولا هنا فَنجل عينيك علشان الاتهام سأحاول أكتبه مرة واحدة فأصابعي لا تطاوعني أن تكتبه أكثر من هذه المرة، الاتهام هو أن البرادعي بيتشرط على البسطاء أيوه هو كده بيني وبينكم اتهام خطييييير أنا مش قادر أبُص للشاشة تاني أراجعه. سامحني لو كان مكتوب فيه كلمة خطأ أعصابي ترتجف من هوله.

البرادعي يعمل كده يا خسارة بس إستنى ما تجريش السطور عايز أسألك سؤال هما يقصدوا مين بلفظ البسطاء؟؟ تفتكروا يقصدون البسطاء الحقيقيين اللي هما أنا وإنتَ معقولة تفتكروا إحنا معقولة على بالهم يا دي الهنا يادي السرور يا دي النور، أنا مش مصدق!

قدر ألمي من الاتهام قدر فرحتي من الاهتمام، بس عندك، أنا راودتني فكرة غريبة إيه هي؟ أشمعنى الآن حَبك معاهم البسطاء وليه إتحمقوا إن فيه حد بيتشرط عليهم تفتكروا عشان إحنا مهمين، ولا مش عايزين يعودونا على تسلُّط حد تاني غيرهم علينا، ولا عشان ما يشاركهمش حد في تشرطهم علينا؟!
أنا مش متأكد من السبب لكن اللي أنا متأكد منه أنهم محموقين أوي وكمان قالوا أننا نرفض –أي البسطاء- تشرُّطه والغريبة إني أنا عمال أسأل الناس اللي حولي: حد منكم يا جدعان رفض تشرط الراجل؟ الكل يقول لا، فزاد استغرابي وقلت يمكن بقى هما مش قصدهم إحنا بكلمة البسطاء وبيني وبينكم لقيت إن دة الأقرب للحقيقة؟

لكن تفتكروا مين ممكن يكون مقصود بكلمة البسطاء أظنهم يقصدون رجال الأعمال المحتكرين للسلع والمحتقرين للشعب أو الساسة الذين يفصلون القوانين ومش هاممهم البسطاء الحقيقيين والذين اعتادوا حقًا على الشروط والتشرط عليهم وده الأقرب للحقيقة لأن دول الوحيدين اللي مش متعودين على التشرط وغير المستفيدين من ترشيح الناس للرئاسة مش كده ولا إيه؟

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :