لكِ الله يا مريم

لكِ الله يا مريم .. وحقك عند رب الأنام
هو الرب .. هو الإله .. لا ينعس ولا ينام

وأنا لابسة فستانى الأبيض بأحضر زفة العرسان
معايا أخويا وبابا وماما وأصحابى وكل الجيران
فرحانين بنأكل شوكولاتة العروسة وكمان معايا لبان

صَرَخت مريم .. أنا الشهيدة بيد الغدر والإجرام
دمى سال على الضفيرة .. وفى إيدى عروستى مرام
بكت الشوارع .. بكت الجدران .. ولسه ها تبكى أعوام...
اغتالوا براءتى بدم بارد .. وانا لسه فى أول الأيام

ماذا جَنيت ؟! وإيه ذنبى ؟! ومين ها يكمل الأحلام ؟
خايفة على ماما حبيبتى وبابا من قسوة الآلآم
وبأقول لهم ما تحزنوش .. أكيد ها أجى لكم فى المنام
واللى لسه ماعشنهوش ها نعيشه فى حب ووئام
لما نتقابل فى السما .. فى حضن يسوع الحَنان
ونكمل باقى حِلمنا .. بعيد عن عالم الأشرار