بقلم : مكاري يونان حنا
يا بلدي
ياللي بقيت فيك غريب
بعد ما كنت يا بلدي حبيب
ليه بيقولوا علي  عميل
ليه سيبتي فرعي يميل
ليه خليتي الطير الساكن فيكي
يهجر عشك ..يكره حضنك

ليه على ارضك
يسيل دم حبايبك
دم زمان روى سينا
رجع مراكبنا ف مراسينا
نسيتي و لا افكرك بينا
يومها تحت الرايه كلنا جينا
ملناش غاية غير اراضينا
و انت بتبكي و تشجعي فينا
ساعتها مسحنا دمعك من على خدك
و قولنا يا بلدي ها ترجع ارضك
ارفعي راسك داحنا حبايبك
 
و اتشديتي و اتعفيتي
بس علينا اتعافيتي
و عملت روحك ناسية
و صبحت علينا قاسية
فرطتي فينا
و ف دم اهالينا
اصلك نمتي و العدو صبح فينا

سامعاني يا بلدي و لا لساكي نايمه
صرخات ولادك بالدم عايمه
آلامنا فيكي صبحت دايمه
الحلق مرار ...
و الجوف نار....
والعين ماليها الدمع
و النوم طار

قاصده يا بلدي و لا نصيب؟!
واعية يا بلدي و لا في حالة غيب؟!
أوعي تكوني  شايفة و ساكته ع العيب
و أياكي تكوني عارفة
أوعي تكوني دخلتي الجيب
تكونيش مزقوقه من حد غريب؟!
تكونيش مجبورة غصب غصيب؟!
طب أبقى عليكي و لا اسيب؟
ابكي و اقول د نصيب؟
اضحك على نفسي
اقول انا  لسه قريب؟
ربك و الحق ما قدرت!!
و انت السبب .......

 اصل القلب   صبح  عليل
 قال ايه ...  كنت فاكرك دليل
توهتيني بحلو كلامك
و قفتيني سنين على بابك
قلت يمكن ينصلح حالك
يمكن تفتكري احبابك
يمكن باقي فيكي شوية حب
يمكن حن القلب
لكنك ما ا فتكرتي!!
و لا سألتي!!

سيبتك هجيت..
البحر وعديت..
هناك و اترميت..
اتغربت و أتمررت....
 من روحي اتبعترت
 اتهنت و اضربت
و ساعات اتشردت
كلت اللقمة بالقليل
و ما اتمتع جفني بالليل
و بقيت و حده و حده احسن م الغير
و شويه شويه صبحت براكي كبير
بعد ما عيشتيني جواكي صغير

ما خبيش عليكي..
 حنيت لليلة ع النيل
شكلك برضه جوه القلب
و الله ما ليك بديل
تقسي علينا
تطردينا
 تخونينا
في مكان غصب عنهم فيكي لينا

رجعت ....
 قلت يمكن عايزة حاجة
يمكن محتاجة
يمكن عرفتي مين يقدر ع الحاجة
لقيت فيكي جلاليب!!
لقيت فيكي شباشيب!!
لقيتك اتمليتي زعابيب!!
و لقيت فيكي يا ما غريب!!!
ارضك بيدوسها واحد
عامل نفسه حبيب
واحد بقى فجأة عليكي رقيب
أتحكم فيكي و غيرلك فكرك
خلاك اتلغبطي..
ما عرفت  عدوك من ابنك!!
يا دوب بسيطي تحت رجلك
نساكي اللي شايل همك
و اللي دمه مخلوط بدمك
وهمك ... خدعك..
و هو عمره ما كان منك

فوقي يا بلدي وحشتينا
ارجعي لمي اللي باقي فبنا
ومن اللي باقي عندك ادينا
وان كانت مية نيلك
لسه نضيفة اروينا
وخليكي فاكرة يا بلدي
محدش باقي عليكي قدينا

Makary_younan@yahoo.com

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :