مينا ملاك عازر
وزير التموين خالد حنفي يقول أنه سيجعل من محال بقالة التموين فروع للمجمعات الاستهلاكية، وأنه سيضيف على بطاقة التموين مواد غذائية وسلع أخرى، وسيبيع اللحم المجمد بتسعة وعشرين جنيه، والطازج بأربعين جنيه، والفول الكيلو بأربعة جنيه وهكذا... وبالتالي سيضطر المستغلون إلى تخفيض أسعارهم، وسيكون متاح للناس أن يختاروا الأصناف التي يريدونها بالأنواع التي يختارونها، يعني حايكون عندك مثلاً 18 نوع رز عشان لو مش عاجبك ده خد ده!!!!.

هو ده الكلام، الحياة بقى لونها بامبي، الفرخة إللي ب22 و23 جنيه وأكتر حاتبقى في عهد خالد حنفي ب15 جنيه، وتعالى بص، خد فكرة واشتري الآن الأسعار مش حاتتكرر، نحن نحطم الأسعار تحطيماً، سؤال ولا مؤاخذة يا حضرة جناب معالي الوزير، هو حضرتك وقفت على باب بقال تموين في حي زي حي شبرا مثلاً، مش حاقول لك حي مُضجع في الفقر، حي متوسط نسبياً

هو حضرتك شفت محال البقال دي إللي ناوي تبيع فيها الفراخ واللحمة والسمنة والزيت والذي منه، شفت مساحاته المهولة، وإزاي فيها تلاجات فاضية، وحضرتك حاتملاها، لو حضرتك رحت وشفت حالة المحال تبقى مصيبة لإن خيال واسع وإحنا مش ناقصين ناس خيالهم واسع، ولو ما رحتِش ولو حتى بعد ما بقيت وزير تبقى المصيبة أعظم لأنك بتحاول تنفذ تخيلات لا أساس لها على أرض الواقع.

يا راجل يا طيب، ده فيه محال تموينية لو دخلتها برجلك اليمين ما تقدرش تدخل معاها الشمال، ده غير إن القائمين عليها حالتهم صعبة، يا حضرة جناب الوزير ألف مبروك عليك الكرسي، خليك عليه إلى أن يقضي الله أمر كان مفعولاً، وأبقى سلم لي على التلاجات إللي في محال البقالة التموينية، وما تقوليش حانوزع عليهم أصلنا مش ناقصين استهلاك كهرباء، ده النور بيتقطع علينا أكتر ما بيجي يا راجل يا طيب

زميلك بتاع الكهرباء طالب عشرة مليون متر غاز يومياً إضافياً لكي لا ينقطع النور في رمضان، بالمناسبة إشمعنى ليه يعني مش عايزينه ينقطع في رمضان؟! عشان التمثيليات الهابطة ولا البرامج الضايعة مش عايزين تحرموا الناس من متعة التفاهة، يعني الرئيس يقول لُمبة موفرة وإنتم تعملوا فينا كده!؟ طبعاً كل سنة ومصر كلها طيبة بمناسبة رمضان، وده شهر عظيم وجميل وله تقديره، لكن ليه ما تبقاش السنة كلها تتعامل معاملة رمضان، لعلكم لم تهتموا بألا ينقطع النور في أيام مذاكرة الطلبة وخاصة في أيام امتحانات الثانوية العامة .

 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :