ياريت نحب بعضنا

الراسل : مايكل أسعد
ليه دايمًا مرفوضين فى وطننا وكأننا "مجرمين"؟!
 ليه مرفوضين وعايشين مهمشين ؟ ذنبنا إننا مسيحيين؟  ولا يمكن عشان إننا مصريين بيداس علينا كل يوم.. ولا فى حد يوم قال دول حقيقى مظلومين..

 نتكلم عن الحرية والديمقراطية، وإحنا مش عايشنها فى بلادنا العربية،  فين الوطنية اللى عاشتها زمان الأمة المصرية؟ دلوقتى عشان مسيحى وحقى ضايع منى بنضّرب فى كنايسنا ودمنا مغرّق الشوارع، وفى الآخر القاتل مختل عقليًا ومسجل خطر.

 أصل عشان إحنا مسيحيين دمنا سهل ورخيص، ولا يمكن عشان اتولدنا مصريين.
 ولا عشان إننا مسيحيين ، من زمان وإحنا متعذبين ومضطهدين، ما هو ما فيش حاجة سهلة اليومين دول، ويمكن يتقال علينا فى يوم إننا إرهابيين.

 اتعلمت زمان فى مدارسنا إن الأمة المصرية خير أمة على وجه الكرة الأرضية بس أنا دلوقتى مش عارف إية وضعنا أمام كل الدنيا، فوقى يا مصر بقى، وضمى أولادك بين جناحتك، قبل ما يكون مصيرنا زى العراق وفلسطين، إحنا مسيحيين مصريين ولينا حقوق كل المصريين، إننا نكون محميين.

يا ريت نحب بعضنا يا مصريين وكفاية نمارس مع بعضنا التمييز، كل حادثة نقول دى فتنة وجاية من الغربيين عشان عايزين يحتلوا المصريين زى أمريكا فى العراق، واسرائيل فى فلسطين، يا ريت نصحى ونفوق، وكفاية تمييز ضد المسيحيين المصريين، يا ريت نتغلب على التمييز، ونعيش كلنا اخوات مصريين، ونلغى كل الفروق اللى بتخلينا دايمًا متخاصمين يلا بقى نتحد يا مصريين، ونقول لكل العالم احنا المصريين مسلمين ومسيحين.