أحبوش

 

كتير بنشوف ناس متقمصة دور ‫#‏أسامة_منير‬ و بيتكلموا عن الحب 
 

منهم اللي مش بيتكلم غير عن الخيانة 
 

او اللي مايعرفش منه غير الوجع و الجراح 
 

و منهم اللي لسة بيدور عليه 
 

و منهم اللي فاكر انه شهريار او فاكرة نفسها شهرذاد 
 

و منهم اللي فاكر الحب مجرد أغنية او حضن او بوسة او ..... !!
 

بس في كل دول .. حد فكر هو عنده ايه يقدر يقدمه لــ حبيبه، او حد منهم فكر في مرة حبيبه شايفة ازاي و لا كل واحد شايف نفسة هو و بس و شايف الحب من منظورة هو و تجاربة الحياتيه البسيطة و اللي ممكن لا تتعدي حب ابن الجيران اللي اتجوز زميلته في الجامعه!!!

علي الهامش:
 

و انا بكتب الكلام ده جه في بالي أغنية سيرة الحب لأم كلثوم و خصوصاً المقطع اللي بتقول فيه :
 

"..  ياللى ظلمتوا الحب وقلتوا و عيدتوا عليه
 

      و قولتوا عليه مش عارف ايه 
 

      العيب فيكم يا فى حبايبكم اما الحب 
 

      يا روحى عليه ياروحي عليه 
 

      فى الدنيا مافيش ابدا ابدا احلى من الحب.." 
 

و هنا كلمات العبقري مرسي جميل عزيز مع الحان الرائع بليغ حمدي ، قدما لنا أنشودة عن الحب و معناه و ان العيب فينا او في حبايبنا و مش في الحب نفسة !

نقطة و من اول السطر:

 

مع ازدياد الحاجة للجواز عند البنات تحديداً يمكن خوفاً من ان يفوتهم قطر الجواز او يتقال عليهم عوانس او... او ...  و طبعا كل بنت منهم بتبص علي المتجوزين (مع مصمصة الشفايف) و تقول هي أحلي مني في ايه و لا اشيك مني في ايه ، لازم ها يكون فعلا فيه مشكلة حقيقية !!
 

بس هنا المشكلة مش في الحب و لكن في نظرة الناس دي للحب و ربط المعاني العميقة بتجارب ذاتية فاشلة تماما و علشان كده بيبقوا خايفين و مشوشين و لما ييجي حد يمسك ايديهم علشان يعدي بيهم لبر الامان تلاقيهم بيبعدوا عنه بدل ما يسمعوا كلام الرائع فؤاد المهندس (سيبيه يمسكها يا فوزية) !!!
 

و ده لانه لما بيجيلهم حب حقيقي هم اول ناس بتقول "أحبوش" !!!!!
 

و علشان كده حابب أقول ان الحب معني أكبر بكتير من كل التجارب الذاتية و اننا لما نحرر الحب جوانا ألاول، هو اللي ها يحررنا من كل اوهامنا دي.