CET 00:00:00 - 05/08/2010

مساحة رأي

بقلم: ناهد فاروق شاروبيم
يا أبونا صلي
وافتح صندوقي وبخرلي
أنا أصلي..
آهِ لو تعرف اللي حصلي

ايه ده اللي أنا لابسه......؟
وهدوم العيد راحت فين؟
والصندوق دا كبير مقا سه....
وأنا يا دوب شبرين
ويا ترى قميصي لقيتوا فيه خرمة واحدة ولا خرمتين؟
والرصاص اللي طلّعوه مني ودوه فين؟

أنا فاكر إني كنت واقف في الشارع
بعد ما كنت من الكنيسة طالع
كنت مع صحابي فرحان
واقف ومدي الأمان
ولا كانشي في الحسبان
يغدر بينا الجبان
دا مينفعش يكون إنسان
وحرام نقول حيوان
ده أكيد شيطان

في لحظة أنا دمي اتصفى
وماكنتش فاكر إنها آخر وقفة
وهدومي الجديدة خلاص
غطّى معالمها الرصاص
وكانت آخر نومة في المشرحة
وحواليا ناس كتير متجرحة
شفت أمي جاية تصرخ
لما شافت جسمي بالدم متلطخ
سامعها بتنادي باسمي
بس أنا خلاص كنت خرجت من جسمي
كان نفسي أهدّيها وأخدها في حضني
وأقول لها: مين الوحش اللي قتلني؟؟
ومن ليلة العيد حرمني
ومن أهلي خطفني

يا أمي جسمي مليان رصاص
والأسفلت بقى بدمي متعاص
مالحقتش أقول آه ولا أتململ
أعذريني يا أمي.. أصل الرصاص جه في مقتل
وكانت آخر حاجة شايفها المدبحة
وصوتك وانتي بتصرخي في المشرحة
مع السلامة يا أمي أنا شايفك سيباني ومروّحة

بس ماتبكيش يا غالية
دموعك علي جسمي نار حامية
أنا طلعت مع صحابي السما العالية
ولابس على راسي أكاليل غالية

شارك بآرائك وتعليقاتك ومناقشاتك في جروبنا على الفيس بوك أنقر هنا
أعرف مزيد من الأخبار فور حدوثها واشترك معانا في تويتر أنقر هنا
  قيم الموضوع:          
 

تقييم الموضوع: الأصوات المشاركة فى التقييم: ٣ صوت عدد التعليقات: ٦ تعليق

الكاتب

ناهد فاروق

فهرس مقالات الكاتب
راسل الكاتب

خيارات

فهرس القسم
اطبع الصفحة
ارسل لصديق
اضف للمفضلة

مواضيع أخرى للكاتب

صرخة من روح شهيد

جديد الموقع