كلمات: ماجد منصور
يا البيه غفلان وتحتك
ملاعين هيضيعوك
يا ضلام عقلك مخللي
(إخوانك) يخدعوك
يا فساد حضرة جنابك
قاللك راح يسندوك
أما الأكيد في ظني
إن رحيلك لابُد
مستني إيه ده حتّى
الكرسي ما بيدوم لحد
واللي بيضحك في وشك
أول ناس هيبيعوك
إسمع يا بن الأكابر
في عينينا انت اتحرقت
إنفي وبرر وكابِر
هدِد واعمِل ما شئت
فمادام ما لكش فايده
ومانتاش راجل بجد
وطريقتك مش مُحايده
ولئيم في كل رَد
أهل البت الصعايده
اللي فيوم أمنوك
ع النعمه اللي ادهالهم
رب الكون والملوك
حالفين ما هيهدا بالهم
ولا ضحكة تخش دارهم
أبداً ما هتتطفىَ نارهم
إلا اما يجرجروك
ومعاك كل اللي والسوُا
وبنفاقهم فرعنوك
إصحى يا شيخ المَناِسر
كذبك قطع الشكوك
مهما هتعمل مُناصر
عُمر ما هيصدقوك
الصفر انت اللي خَدته
والحق انت اللي بِعته
وحلفت يمين وخُنته
ودبحت وَرْدة قاصر
ليه ما طلعتِش بعِبره
من التاريخ المُعاصر
فيه ناس لو جيت عليهم
راح تبقى انت اللي خاسر
بُص وراك ولا جنبك
تيجي إيه جنب القياصر
لو سلطانهم نَفعهُم
كان ممكن ينفعوك
خليك راكب دماغك
واعمل سَمعَك تقيل
بس الشابه اليتيمة
ليها رب اسمه الوكيل
وان سِبت اللي سرقها
الصِفر اللي ف ورقها
والملح اللي ف عَرَقها
هيشاوروا على الدليل
ويذيعوا ويفضحوك
أبداً ما هيسيبوك
هيلاحقوك طول حياتك
وراك ليوم مَمَاتك
وياك بعد اما تبقى
رِمّه ف تُربة أبوك
هذه الكلمات غير موجهة لأي كيان، أو لأي شخص بعينه.. وإنما هي رسالة لكل فاسد) قصيدة: "صفر مريم"
