بقلم:عزة صبحي
تقرر عمل لجنة لغربلة النجوم وانتقاء الاصوات الجيدة واستبعاد الاصوات النشاذ التى افسدت الذوق العام ، واساءت الى الطرب والفن الجميل ، فتم عمل غربال كبير يدخل فيه النجوم واللى هيقع منه يستبعد واللى هيتبقى جوه الغربال هو اللى هيستمر على الساحة الفنية ،
وابتدا الغربال الغربلة وابتدت النجوم فى الدخول ، وكانت اولى المتغربلات الفنانة الجميلة انغام ، واللى وقعت من الغربال اول م دخلت على طول وده طبعا لرفعها ونحافتها الشديدة ،اتضايقت اللجنة جدا لان الغربال غربل اجمل الاصوات ووقعها منه ، ولكن اللجنة استمرت فى الغربلة ،و دخل الفنان نبيل شعيل المحبوب ولكنه بمجرد دخوله قطع الغربال ووقع منه بسبب حجمه ووزنه الكبير فتم استبعاد نبيل شعيل ، وسط قلة حيلة اللجنة الفنية ولكنهم اصلحوا الغربال مرة تانية وكملوا ، فدخل الفنان الكبير هانى شاكر ولكن اتكرر نفس المشهد واتقطع الغربال مرة تانية وفشل هانى شاكر اللى بقاله سنين وسنين بيغنى ، وبما ان المطربين اللى بيعرفوا يغنوا هما اللى وقعوا من الغربال ، الفكرة منجحتش ولكن اللجنة فكرت فى فكرة تانية واعلنت توقف الغربلة لان الغربال يعانى من بعض المشاكل ولابد من تغييره ولكن الغربلة مستمرة
غربال اليكترونى
بعد المهزلة اللى حصلت واستبعاد اهم الاصوات المهمة من الغناء قررت اللجنة تغيير الغربال واستبداله بغربال اليكترونى صغير مبرمج بحيث يبتسم للصوت العذب الجميل صاحب الكلمات الجميلة ويكشر للصوت النشاذ الغير مهضوم او بمعنى اصح "اللى مش على مزاجه الفنى" وطبعا بدون محسنات صوتية ولا حاجة ، فكرة انما ايه جهنمية ، ابتدت الغربلة مرة تانية والكل جاهز للغربال دخلت نانسى عجرم الامورة مبتسمة وبدات تغنى " يا طبطب يا ادلع" الغربال مش ابتسم ده اتنطط تنطيط وعدت نانسى ، بصراحة غربال عنده حق ، بعدها على طول دخلت هيفا وهبى هى الحقيقة ملحقتش تغنى هى بصت للغربال وقالت بصوت مدلع " شو هيذا هو الغربال ؟ "الغربال سمع صوتها من هنا وابتسم جداااااا وفرح ونجحت هيفا ولجنة الغربال قاعدة تكتب النتايج مش عارفة تعمل ايه وطبعا لان الغربال اليكترونى اسم الله عليه بيطلع النتيجة قدام المطرب وهو واقف يعنى مينفعش حد يغير النتيجة ، ما علينا دخل على الحجار اللجنة وقفتله ورحبت بيه جدا وقالوا اهو هو ده الطرب الاصيل اتفضل يا استاذ على النتيجة معروفة مسبقا ، لسة هيقول" جفنه " الغربال ملحقش يسمع "علم الغزل" لانه انقطع من صوت الاستاذ على القوى جداا ، وطبعا مجاش على مزاجه فالنتيجة طبعا انه معداش م الغربال ولجنة الغربال هتتجنن م الغربال واللى جاب الغربال، وبعدين هنعمل ايه ؟ ، بيسالوا وبيردوا على نفسهم لسة فى اصوات تانى حلوة كتيير انتوا ناسيين ولا ايه يالا نكمل ،
دخل الاستاذ محمد فؤاد واول م دخل بصوته الجميل جدا واحساسه الرائع بدأ يغنى للغربال انا بين ايديك طب قولى افكر ف اللى فات والجاى ليه الله الغربال ابتسم وحس بكيانه ونجح محمد فؤاد وعدى اللجنة فرحت اوى لاول مرة الغربال يقهم ويعديلنا حد بيعرف يغنى وعمرو دياب وراه على طول ومعاه الموزز انما ايه الظاهر مش بيغنى الا بيهم وبدا" قمرين دول ولا عينيك "الله يا استاذ عمرو رائع الغربال فرح بالرقص والغنى ايوة هو ده ناجح يا استاذ عمرو اللجنة قالت لتانى مرة ينجح حد كويس حلو اوى يالا نكمل ، دخلت شيرين وبدأت "جرح تانى" الغربال الحقيقة اتنكد جدا وعيط لانه افتكر الجرح الاولانى بتاع الاستاذ على الحجار وطبعا النتيجة معروفة وهى فشل شيرين ف الغربلة ، وبعدها على طول دخل مدحت صالح مطرب الاوبرا ابو حس رائع وقال وهو عايش ف الاغنية " رفضك يا زمانى يا اوانى يا مكانى " الغربال حس انه بيلقح عليه ومش عاجبه ان يتغربل مع اللى بيتغربلوا راح كشر وقال ف نفسه شوفلك غربال تانى يغربلك وسقط الاستاذ اللى بيغنى من سنين ، اما كاظم الساهر دخل يغنى وقال " كلك على بعضك حلو " الغربال انبسط جدا وشوية وكان هيطلع دبدوب هدية للاستاذ ، اللجنة اتجننت " وبصت لبعضها وبداوا يشكوا ف نفسهم وبعدين هو الغربال ده بيفهم ولا مبيفهمش ده عدى الناس اللى واكلة السوق مصيبة لنكون احنا اللى مبنعرفش نسمع ، وعجبى قال غربال النجوم قال
عجبت لك يا زمن هههههههههه
