بقلم: مينا ملاك عازر
كل حاجة في "مصر" بتحصل من أجلك أنت، كل حاجة هتحصل من أجلك أنت، لازم تبقى متأكد من كده، إن "مصر" ما عندهاش إلا أنت، وأنت اللي على الحِجر، وهي مش مشغولة بحاجة غير بيك أنت، وأنت الحب وأنت عمري.

 يعني مثلاً، أوقفنا برنامج "القاهرة اليوم" الذي يقدمه الإعلامي "عمرو أديب" من أجلك أنت، قل لي ليه؟ أقول لك لأسباب كتيرة، لكن أهمها لأن قناته كانت مش بتدفع اللي عليها، وكانت عايزة تضحك عليك في حق إيجار ستوديوهات مأجراها، وكان ده هيؤثر عليك في الميزانية المصرية، وهيؤثر بالسلب على حقوقك أنت فأوقفناها من أجلك أنت.

 كمان عشان "عمرو" ده مشاغب وصوته عالي ووحش وبيقول كلام بيعكنن عليك وبيضايقك، وبيخليك تشوف الدنيا سودة مع أنها بمبي، وبيرفع ضغطك أنت فبيكلفك أدوية للضغط ويمكن للقلب ويمكن لحاجات تانية، فعملنا كده من أجلك أنت.

 استبعاد "إبراهيم عيسى" من "أون.تي.في" من أجلك أنت، لأنه مش فاضي لـ"الدستور"، وبالتالي هيقصر في تقديم خدمة كويسة لأجلك أنت، فكان يا إما هيقصر في رئاسة تحرير "الدستور"، أو في برنامج لـ"أون.تي.في"، فاستبعدناه من أجلك أنت، حتى يركز في حاجة واحدة ويطلعها ممتازة من أجلك أنت.

 ثم استبعدناه من "الدستور" لأنه وحش ومش عايز يدفع الضرايب اللي عليه، والضرايب طبعـًا بتصب في مصلحتك أنت، بنبني ليك بيها مدارس، وبنرصف الطرق السريعة والبطيئة، وبنبني بيها محطات للكهرباء، يمكن ندفع بيها ثمن المحطة النووية، ولو تكفل المالك الجديد بالضرايب كان هيؤثر بالسلب على معارضته القوية التي تهز أركان الحزب الحاكم من تحت أقدامه، وبتخلي الحزب الحاكم يمشي يلف حوالين نفسه ويدرس كل حاجة، وبالتالي كل حاجة تطلع مظبوطة من أجلك أنت.

 ومن أجلك أنت نحن موجودون، وقررنا مراقبة وتضييق الخناق على باعثي الرسائل الخبرية حتى لا نعكر مزاجك الغالي والعالي والمهم عندنا، وكل ده من أجلك أنت، يعني تخيل مثلاً لو جاءتك رسالة بتدعوك لأن تشارك في انتخابات مجلس الشعب القادمة، فلبيت النداء ونزلت تعبت نفسك، وإحنا مش عايزين جنابك تتعب نفسك، وبعدين لو رحت بقى اللجنة هتقعد تلف على اسمك، وتتعب نفسك، ولو لقيت اسمك غالبـًا هتلاقيه انتخب، وأدلى بصوته، يبقى كان عليك من ده بإيه؟ شفت بقى إنك هتلاقي نفسك تعبت، أنت مش كده وبس، ممكن تلاقي ناس وحشة واقفين يضايقوك، يضربوك يعكروا مزاجك، فنحن بنتكفل بحكاية الانتحابات، وده طبعـًا "من أجلك أنت"!!

 عرفت بقى إن أنت غالي علينا، وكل حاجة بنعملها في الأول والآخر من أجلك أنت، فأنت أغلى ما في البلد، وهي "مصر" تبقى ليها طعم من غيرك أنت، اصبر ده اللي جاي أكتر، وكله ما تنساش من أجل مين؟ من أجلك أنت، لا من أجلك أنت، آه آه من أجلك أنت، صح ما هو أنا وأنت واحد، واللي في مصلحتك برضه في مصلحتي "من أجلك ...".

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :