حليم اسكندر
مش راح اهلل ولا اطبل
مش راح ابالغ ولا اهول
كله بيفتي كله يقول
وتحسه اكبر مسئول
صدعتونا كفايه حرام
شبعتونا جدال وكلام
وجهة نظري اني استني
ادرس كل جوانبه اتأني
عندي ناقصه لسه الصوره
مليانه بغموض مبتوره
حاسس ان في شبوره
من جوايا حاجات مكسوره
م اللي بيحصل فيكي حزين
رايحه بينا يا مصر لفين؟ ؟
مش بس عشان صنافير وتيران
فيكي حاجات كتيره كمان
خلت فكري كتير حيران
ابنك يا بلدي كتير تعبان
ناقصه انه يكون انسان
نفسي ف يوم ترجع لك هيبتك
يعرف كل العالم قيمتك
ما انتي مليتي الدنيا حضاره
طب وفن وفلك وعماره
كنتي لكل الكون ده مناره
ثقتي انك راجعه ف يوم
تشرق شمسك بعد غيوم
اصل الرب شرفك بزياره
ومعاه يوسف والعدراء الباره
هو وعدنا ووعده امين
ليكي البركه ليوم الدين
واحنا في وعوده واثقين
راجعه يا " مصر " قولوا أمين
