بقلم: أماني موسى
يعجز قلمي عن كتابة مادة تتسم بالسخرية، فلا سخرية أكثر مما نعيشها الآن حيث هجوم قواتنا الباسلة على جيوش العدو –يوووه أقصد الأقباط – في غزوة العمرانية، والحقيقة المشهد فكرني بنفس ذات الهجوم من القوات المسلحة المصرائيلية على أقباط فلسطين!!
متبصش كدة وتستغرب، شوف الصور وعربيات الأمن والعدد المهول من رجال الأمن، كل دول رايحين يحرروا العمرانية والحمد لله وإن شاء الله ولا حول ولا قوة إلا بالله.
إليكم بعضًا من الامتحانات السهلة الصعبة التي يضعنا فيها نحن المصريون القدر البمبي طبعًا بس بقى أسود والحمد لله بفعل الزمن والمسئولين، وعليك بإجاباتها حتى تحصل على الجائزة الفورية وهي (جايزة الدولة التقديرية والتشجيعية )

أولاً: التعبير
أكتب فيما لا يقل عن 300 صفحة عن الفساد المنتشر في أرجاء البلاد ، ومتسألش ليه 300 صفحة ، أهو الرقم جه كدة وخلاص، عبر براحتك عزيزي المواطن بس خد بالك مش براحتك أوي وإلا هتروح في رحلة منيلة قصدي نيلية طبعًا للقمر، ومن غير تذكرة رجوع.

ثانيًا: أختار من بين الأقواس
* لو أنت سوبر مان وبقيت أقوى إنسان هتعمل إيه
1-هتروح تهجم على بيوت وكنايس شركاء الوطن.
2-هتروح تضرب كل مسئول بهلول، كان عن عذابك في الأرض مسئول.
3-هتروح تاني برضه على نفس بيوت وكنايس نفس شركاء الوطن اللي فوق.

ثالثًا: أكمل
بيع العيش بالمسامير لـ (تقوية جسم المواطن طبعًا وإمداده بالمعادن اللازمة – ابتكار طعم جديد للعيش – عشان نبقى شعب يفوت في الحديد - قول أنت بقى أنا مش عارف).

رابعًا: ضع علامة صح أو صح (لأن الخطأ مش وارد خالص هنا)
* لا يعاني المواطن المصري أية أزمات حقيقية (     )
* اللحمة متوفرة بالأسواق وبأسعار في متناول الجميع (     )
* تم حل الأزمة السكانية والقضاء على البطالة والتحرش وكذا الأزمات الطائفية (     )

خامسًا: ينقسم المفكرون في مصر إلى
كاتب ومفكر يشجب ويدين ويستنكر طوال الوقت.
كاتب وناشط حقوقي في مجال الفيس بوك وتويتر برضه طول الوقت.
كاذب ومفجر على ما تفرج ويتم استضافته في كل وسائل الإعلام.
كاتب وناشط ومفكر ودكتور ويلقب بسعادة المصدر البيه المسئول.
 
سادسًا: فقرة حرة
- تصريحات أحدهم بأن إسرائيل وراء أحداث العمرانية ، بتضحك ليه كدة بصوت عالي؟؟
آه صح نسيت أصل إحنا في الفقرة الحرة صح في فقرة (أضحك مع المسئولين)
-نجح المصريون في القضاء على اليهود واليونان القاطنين في مصر (زمااااان) بعدما كنت مصر أم الدنيا وتسع كل الطوايف على أرضها، تفتكر كدة بذكائك هينجحوا في ترحيل كل الأقليات اللي فيها بعد كم سنة؟

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :