بقلم: مروة رخا
كل كام شهر كدة بتجيلى حالة من "التعشيش" ... nesting يعنى. بتلاقينى كدة جرة ناعم و بـ أبث موجات حنية مكثفة والفساتين واللبس البناتى بيطلع ولطافة بقى وأنوثة ورقة ... أغلب الوقت بيتصادف مرور مواطن فى طريقى وأنا فى حالة التعشيش دى وزى الفراش وانجذابه للنار، المواطن بينجذب ليا. أنا وقتها بتبقى نيتى خالصة وقلبى صافى وفعلاً ببقى عايزة أتجوز. من غير الدخول فى تفاصيل قرقشة وقرمشة ومصمصة المواطن ... الأشلاء بتبقى للركب والمشرحة بتزيد قتيل.
فى أول 2009 ... بالتحديد فى ليلة راس السنة أعلنت إنى هاتجوز ... هو دا هدفى فى 2009 الـ new year resolution وكدة.

وكانت أطول حالة من التعشيش مريت بيها ... العادى إن الحالة دى مش بتزيد عن شهر كحد أقصى لكن المرة دى قعدت خمس شهور متواصلة. كانت حواليا هالة عظيمة من اللون البرتقالى ... هالة من الإبداع والإيجابية والحياة والسعادة الداخلية والسلام النفسى والإستقرار وتحقيق الذات ... وإنجذب مواطن ورا مواطن للهالة البرتقالى ... واتحرقوا!
أنا مش هدخل فى تفاصيل الأخطاء المكررة والغباوة المركبة ولا هاتكلم عن فترة غثيان ما قبل انتهاء العلاقة ولا فترة اكتئاب ما بعد انتهاء العلاقة ولا ردود فعل المواطن ولا ردود فعلى تجاه ردود فعل المواطن ... مش هو دا موضوعنا.

موضوعنا بقى هو مواعدة خبيرة العلاقة العاطفية ... ما هو دا تعريفى الإعلامى وشغلى الشاغل وأكبر خبراتى ومصدر موضوعاتى ومقالاتى.
لما بقابل المواطن وبأقول إن أنا كاتبة متخصصة فى العلاقات العاطفية وعندى برامج وناس بتبعت لى مشاكلها بيحصل رد فعل من اتنين ... يا ضحك مستمر وسخرية وتريقة ... يا حاجب مرفوع وإنصات باهتمام وكأنى دكتور زويل بيحكى تاريخ حياته.
وتبتدى العلاقة ... وتنتهى بسبب افتراضات مالهاش أى أساس من الصحة

أول افتراض: متوقع إنى عندى كل الإجابات لكل أسئلته عن كل علاقاته السابقة. بيقعد يحكى ويسأل وأنا باحس إنى طبيب نفسى مش واحدة فى ميعاد غرامى.
تانى افتراض: فاكرنى عرافة وبقرا المستخبى. بيسكت ويبص لى ويسألنى تفتكرى أنا بافكر فى إيه؟ أو تفتكرى أنا عايز إيه دلوقتى؟ أو تفتكرى احنا موضوعنا هيكمل؟
تالث افتراض: فاكرنى حاوى وعندى حلول سحرية لكل المشاكل. كل سؤال أسأله بيبقى الرد "هو مش انتى خبيرة العلاقات العاطفية؟"
رابع افتراض: فاكرنى قديسة مش إنسانة ممكن تفقد أعصابها. عادى إن مودى يقلب وبوزى يطلع وصوتى يعلا وأزهق وأتخنق وأتزرزر
خامس افتراض: فاكرنى مش زى بقية بنات حواء محتاجة اهتمام وكلام حلو وإنى أشوف فى عينيه الحب والإنجذاب فى كل لحظة
سادس افتراض: فاكرنى عبيطة وممكن يضحك عليا بكلمتين مش عارف إنى عندى حساسية مفرطة تجاه القرع والخيار والبكش والكليشيهات والكلمات الجوفاء المفرغة الخاوية المقرفة
سابع افتراض: فاكرنى عمياء ومش شايفة من الغربال ... مش شايفة إنه بيكدب أو إنه بيرسم أو إنه مش عايش عيشة أهله
تامن افتراض: فاكرنى ممكن أدخل جواه وأصلح ما أفسدته أمه وداس عليه أبوه ... كلنا جرحى وأسرى حرب .. خلاص بقى .. مش هنقعد نغنيها على الربابة ونستدر بيها عطف الناس
تاسع افتراض: فاكر إن كفاية معرفتى بدهاليز العلاقات علشان علاقتنا تنجح وهو بقى يريح ويأنتخ وكفاية عليا طلته البهيه
عاشر افتراض: فاكر إن أنا ماعنديش أشباح وأموات وفوبيات وصندوق أسود قابل للإنفجار فى أى لحظة ... أنا ما عنديش حدود ولا أسوار ولا أبواب مغلقة ولا أى حواجز من أى نوع ... أنا أرض واسعة ممتدة على مرمى البصر ... بس مفخخة!
ليه المواطن المنتظر بيتهمنى بالفشل فى علاقاتى؟

هو مش الدكاترة ممكن يعيوا واللعيبة ممكن ضرابتهم تخيب والقناصة ممكن عيارهم يطيش ... وأنا كمان علاقاتى ممكن تبوظ!

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :