بقلم: أماني موسى
وإحنا واقفين على أخر سلمة في 2010 ، بس أوعى تبص وراك لا تقع، تعالوا نشوف مع بعضينا كدة ونلقي نظرة على حصاد سنة كاملة ، هنلاقي إن حصادنا متميز وعالي في جميع المجالات –أيوة والاهي- .
خد عندك مثلاً حصادنا العلمي، حدث ولا حرج، تفوق باهر في جميع المجالات العلمية ما شاء الله، بعد ما طلعنا القمر واكتشفنا علاج لكل الأمراض المستعصية، توصلنا لأهم اكتشاف وهو إن الموساد ورا قروش شرم الشيخ المفترسة و ورا كمان نوبة البرد القارص اللي هبت علينا، جاتها قرصة في قلبها الوحشة دي.
طيب والمجال الأدبي؟؟! طبعًا مقلوكوش ، حالة من الفيضان في الإبداع الأدبي على كافة المجالات وطبعًا الناس مقطعة نفسها من كتر القراية والثقافة ، وبخاصةً كتب كاميليا وعباس وعلي (أصلها مسلية زي قصص ميكي وسمير ) وبرضه بتبيع وتجيب فلوس.
أما المجال الفني فحدثت فيه طفرة في الأداء والأعمال، من شفط لنفخ لشد لزوم الكاميرات ، مع بعض الدين لزوم الانتشار.
طيب والمجال الطبي؟ طبعًا زي بقية إخواته من المجالات، تفوقنا.... وممكن تتأكد بنفسك من دة من خلال إعلانات التداوي برجل الفرخة وراس النملة وقرن الحمار، وكمان هتلاحظه من خلال المستوى السياحي للمستشفيات العامة. حاجة عظمة فعلاً!!!
أما مجال الدين، فهو الوحيد اللي تفوقنا فيه، سيل من الكتب الدينية وسيل من البرامج الدينية ونفس السيل اللي فات من الاعلانات الدينية، والمظاهرات الدينية والأكل الديني والزي الديني، يالهوي دة كله بقى ديني!!!
بص هو تقريبًا إحنا منجحناش غير في المجال الديني ، وكل الكلام اللي فوق دة خيال علمي.
دة مش كلامي، دة كلام الإحصائية اللي بتقول إن المصري حصل على 465 ألف فتوى في سنة 2010 ومخدناش حت ربعهم في أي مجال تاني، مش بذمتكوا حاجة تكسف؟
إلا صحيح محدش يعرف مصر راحت فين أو جاية الساعة كم؟ أصلها وحشتني أوي، شكلها تاهت في مظاهرة دينية ولا كتاب من إياهم.
مصر راحت فين؟
بقلكوا إيه ما تيجوا نفوق وننادي عليها: محدش شاف مصر يا ولاد الحلال؟

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :