بقلم: محمد عاطف
قوليلي يا بنت مصر هو انتي ايه ذنبك
تموتي ليه يا جميله و ينكسوا علمك
مين اللي خان الوطن و بكَّى عيون أهلك
أنا مصري مسلم لكن دمي من دمك
قالتلي أنا مش عارفه.. ليه قتلوني ؟!ا
لو كنت حتى غلط كانوا يعاتبوني
أنا كل ذنبي خرجت و الفرحة في عيوني
في ليلة كانت عيد مع ناس حبوني
ماشية في شارع فرحانة بسنة جديدة
كان عندي فيها أمل وأماني سعيدة
فجأه جرى اللي جرى و لقتني وحيدة
صوت الصراخ تسمعه روحي وأنا بعيدة
و شوفت أمي بتبكي وصوت نداها عالي
رايحه لفين يا مريم يا عُمر كان غالي
وأصحابي مسلم مسيحي الكل بكاني
بدموع ساكنها الألم على اللي جرالي
مانا برضوا ليا اصحاب كتير مسلمين
ولا عمرنا اختلفنا رغم اختلاف الدين
كان بينا حب و موده ولبعضنا قريبين
وان حد فيهم يحزن بلاقي قلبي حزين
قلت يا مريم يمكن مُتي عشان قبطية
فكان دينك السبب انك تكوني ضحية
قالتلي لا يا مصري مش هيا دي القضية
أنا اتقتلت عشان تحصل فتنة طائفية
عشان كدا بوصيكم تفضلوا سوا مع بعض
قتلي وانا وسطيكم زي اغتصاب العرض
أنا قلت حقك هيرجع... حقك علينا فرض
واللي طفوا شمعتك هنخسف بيهم الأرض
 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :