مدير تحرير "البوابة نيوز": الرئيس بينفذ أحكام واجبة النفاذ وبيحاسب على فاتورة عمرها أكتر من 40 سنة

كتب: محرر الأقباط متحدون
علق الكاتب الصحفي  محمود بسيوني، مدير تحرير البوابة نيوز، على الوضع الحالي من تعويم الجنيه وتبعات ذلك، قائلًت: "عشان الخبراء كتير ..عندى كلمتين.. الحكومة والبنك المركزى ماشين على كتاب الاقتصاد.. إحنا في موقف مالي صعب من حادث الطائرة الروسية، زاد عليها الأزمة الاقتصادية في الخليج، كل فواتيرنا زادت كدولة، لكن نحمد ربنا أن ديونا داخلية، للمصريين يعني".

وأضاف "بسيوني"، عبر صفحته الشخصية على (الفيس بوك): "القرارات اتأخرت، وكلنا عارفين إنها قادمة قادمة، مافيش بلد في الدنيا تستحمل كل حاجة بسعرين ، وحكومة من غير موارد تناسب مصروفاتها سواء رواتب أو دعم".

وأوضح رئيس التحرير، "لو كان الرئيس بيبحث عن شعبية كان إداها مسكنات زي اللي قبله، فك الاحتياطي النقدي مثلًا أو وقف المشروعات القومية اللي شغال فيها مصريين بالمناسبة.. كان هيمشي بطل شعبوي والناس تصقف له ، لكنه من أول يوم عارف الأزمة وبيمهد للناس، خطة رفع الدعم معلنة، وتحرير سعر الصرف معلن ومن قبل مفاوضات صندوق النقد لكن الناس بتنسى".

وأشار إلى أن "عايز تنتقد الحكومة براحتك وحقك، لكن ما تنساش أن اللى بيضاربوا مصريين، واللي بيفجروا ويخوفوا السياحة ترجع مصريين، وإن اللي بيزرعوا الرز في أرض مصر وبمية مصر وبيرفضوا يبيعوه للحكومة مصريين".

ولفت "بسيوني"، إلى أن "مش بزايد وأنا شخصيًا مضرور وكلنا هنحس بالمشكلة وشايف أن كل واحد يعمل اللي يريحه، لكن مين في الأخر هيفكر في البلد، صانع القرار ما فيش قدامه اختيارات ما بين متعدد، الرئيس بينفذ أحكام واجبة النفاذ وبيحاسب على فاتورة عمرها أكتر من 40 سنة.

وأكد أن "الحل العمل و الإنتاج الجيد ، الإنتاج ، الإنتاج ، الإنتاج ، الإنتاج ولأخر العمر".

واختتم قائلًا، " مصر معدتش حمل تصفية حسابات ولا صراع نظريات ومدارس وكل واحد عايز يقول للتاني شوفت مش قلتلك انا كنت صح، مش لحظة صح وغلط.. لحظة توحد واصطفاف عشان نعدى ..عشان نبنى ..عشان نقدر نعيش.. نبطل خناق و نفكر مرة بصيغة المجموع مش بصيغة الفرد.