تفاصيل 15 دقيقة من حوار السيسي و«فتاة العربة» (صور وفيديو)

أذاع التليفزيون المصري، مساء الأحد، لقاء الرئيس عبدالفتاح السيسي مع منى السيد إبراهيم، المعروفة إعلاميًا بـ«فتاة العربة »، حيث رحب بها ووجه وزارة الإسكان بتوفير شقة مجهزة بكامل الأثاث لها ولأسرتها، ومساعدتها فى تعلُّم قيادة السيارات، على أن يتم توفير سيارة نقل بضائع لها لتقودها بدلاً من جر عربة البضائع، كما تَكَفَّل بتحمل تكلفة تأثيث شقة نجل شقيقها حتى يمكنه الزواج.

وبدأ الحوار بين السيسي و«فتاة العربية»، بقول الرئيس: «أهلًا وسهلًا شرفتينًا»، فعبرت منى عن سعادتها للقائه، فرد عليها: «أنا اللي سعيد بيكي»، فدعت له: «ربنا يعينك ويعينا».


كما تمنت «فتاة العربة» أن «مصر تبقى بخير وسعادة»، فرد السيسي عليها في حوارهما، الذي دار داخل قصر الاتحادية : «طول ما فيها ناس زيك هتبقى بخير»، فقالت له: «ما هي الناس ما بتعرفش كده الناس تقعد على القهوة وبيشربوا شاي وقهوة وسجائر، وما بيسعوش على لقمة عيشهم، وبحب أشتغل عشان ماحتجش لحد»، فرد الرئيس عليها: «ربنا ما يحوجك لحد»، فقالت له: «ربنا ما يرميك في ضيقة»، فكان أن رد عليها بقوله: «أمين يا رب».

كما قالت «فتاة العربة» للرئيس: «ربنا يديك الصحة ويديك اللي أنت نفسك فيه»، ليرد السيسي بعد ذلك، بقوله: «إنتي ما تعرفيش إنتي عملتي معايا إيه النهارده، ولما شوفتك في التليفزيون قلت إيه ده»، فقالت: «أنا ماكنتش أعرف إنه هما صورني»، فرد عليها: «ده عشان يبقى إحنا لينا حظ نشوفك ونتكلم معاكي».


وخاطبها السيسي: «قول لي بقى إيه اللي ممكن أعمله ليكي»، فردت «فتاة العربة»: «المهم إن شوفتك بخير، والمهم التسرت من عند ربنا».

وسألها الرئيس: «عرفت إن إنتي هتطلعي عمرة.. مبسوطة؟»، فأجابت «فتاة «العربة»: «مبسوطة إني أنا شوفتك»، فقال لها السيسي: «إنتي دلوقتي بقيتي مثل للمصريين، مثل جميل وقدوة عظيمة».


ووجهت «فتاة العربة» رسالة للمصريين: «الناس هتشتغل وتشقى وتتعب وكل ما يلاقوا شغل الدنيا هتفتح في وشهم، وأقول لازم تجروا لقمة عيشكم بالحلال، وما حدش واخد منها حاجة أصلا».

وقال السيسي لـ«فتاة العربة»: «أنا شوفت التروسيكل اللي إنتي بتشتغلي به، وعاوزاه تروسيكل جديد ولا عربية أحسن»، فردت عليه: «اللي أنت تشوفه»، فقال لها: «لا اللي إنتي عاوزاه»، فأجابته: «اللي أننت تشوفه يا أستاذ، واللي أنت تؤمر به أنا تحت أمرك»، فضحك السيسي ثم قال: «أنا عاوز أعمل لك الحاجة اللي نقولك بيها شرفتينا، وأنا عارف إن وزارة الإسكان هتوفر شقة ليكي وهتبقى مفروشة، ويارب تكون مناسبة ليكي».


بعدها، سألها السيسي: «لو عملناكي السواقة وجبنالك عربية أحسن، هتقدري تتعلمي السواقة؟»، فترد بالإيجاب مع ضحك الرئيس.

ويضيف السيسي: «عاوزة تقوليلي إيه تاني؟» فتجيبه: «عاوز أقولك إن أنا سعيدة إن أنا شوفتك، وفرحانة إن أنا شوفتك بخير وسلام، ويديك الصحة والعافية ويخلي لك عيالك ويديك على قد نيتك»، فيرد الرئيس عليها: «لا يديني من فضله أحسن».

ويتابع السيسي: «عاوزة تقولي إيه للمصريين كلهم؟»، فترد: «عاوزة أقول لهم اشتغلوا واتعبوا، ويشوفوا أكل عيشهم عشان يلاقوا الدنيا ماشية معاهم».

وسأل السيسي «فتاة العربة»: «إنتي بتكسبي كام في اليوم؟»، فأجابت: «حسب السوق معايا.. حسب السوق ساعات أرجع ببضاعة وساعات أبيعها عشان باخد شكك من واحد، وآخر النهار أسددها».


وكررت «فتاة العربة» دعواتها للرئيس، قائلة: «ربنا يديك على قد نيتك»، فرد عليها السيسي: «ما قلت لك من فضله.. النية مش قد فضل ربنا»، فقالت له: «ربنا يديك من فضله ويديك على قد نيتك»، فرد عليها ضاحكًا: «برضه تاني».

كما سألها السيسي: «عاوزة تقوليلي إيه كمان؟»، فأجابت: «عاوزة أقولك إن أنا شوفتك بخير وسعادة، ويديك على قد اللي أنت عايزه»، فقال لها الرئيس: «عارفة أنا عايز إيه؟»، فردت عليه:« الستر»، فاستكمل كلمته، قائلًا: «عايز ستر مصر».

وأشار السيسي إلى حضور «فتاة العربة» مؤتمر الشباب المقبل، قائلًا: «عارفة إنك هتبقي معانا في المؤرمر اللي جاي، كمان 10 -15 يوم هتقولي ليهم كلمة، وكل المصريين هيسمعوا منك وهتقولي كلام كويس»، مضيفًا: «أنا اتشرفت بيكي والتقيت بإنسانة صالحة».

وسألها الرئيس: «ما بتاكليش خالص»، فأجابت «فتاة العربة»: «مرة واحدة».

وواصل حديثه: «أنا مش عارف أقولك إيه، مش عارف أنا ما عنديش كلام أقوله، لأنه ما بقاش فيه كلام أقوله.. ما بقاش فيه كلام والله.. بس أنا بتعجب على قدرة ربنا في خلقه إنه خلى الست منى مثل لينا».


واستكمل: «قلنا إن إحنا نجيب عربية ونعلمك السواقة، بس إحنا هنحط على العربية صورتك، ولا تزعلي؟»، فأكدت أنها موافقة على وضع صورتها، فقال لها السيسي: «وتبقي إنت ماشية قدام الناس كلها عارفين مين دي، والعربية هجيبهالك مش من الدولة، هجيبهالك من معايا أنا».

وأثنى السيسي على كفاحها طوال مدة 20 سنة، بقوله: «ده قمة الشرف اللي إنتي تعمليه ده يا ست منى.. ده قمة الشرف، والنهارده يوم جميل إن أنا شوفتك ويوم جميل إن أنا التقيتك واتعملت منك حاجة»، فقالت له: «إنت اللي بتعلمنا».

بعدها، اختتم السيسي اللقاء، الذي بلغت مدته نحو 15 دقيقة، بقوله: «تسمحيلي أوصلك للعربية».