حزين عليكي يا بلدي

جورج ميخائيل عازر

قاضي مَسَكوه بيتاجر ف الحشيش
مواطن ف القسم قتله ظابط وشاويش

حكومه أغلب الوزراء طرابيش
ترفع الأسعار بالراحه وبشويش

البقال يقولك عن السكر ماعنديش
ناس ع الدوام بتشتم ف الجيش

فصيل بياكل بقلاوه وياميش
وبشر تعبان بيجري علي لقمة عيش

وناس عايشه ع القراقيش
مات الذوق...عروسة المولد...من غير كرانيش
ناس منافقه داهنه وشها ورنيش

موضه عجيبه...البلوزه...من قماش الخيش
الناس مش شايفه الحقيقه النظر شيش بيش
شباب ضايع...زادت...حالات الطيش

إرهاب ودمار...في رفح...والعريش
فساد ورشوه وسرقه وطلب بقشيش

ناس بتبص علي ناس من خلف الشيش
الدم ف العروق واقف مابيمشيش
لو شوفت ميت صدقوني ماببكيش