فيه ألف غيره بيتولَد..

لا تعزينى ولا أعزيك، الشهادة نصر لى وليك، وإن كان فى أرضك مات شهيد، فيه ألف غيره بيتولَد.

بصوته يعزينا الفنان الكبير محمد نوح من قبره، يشد من أزرنا، ويرفع همتنا، ويؤجج فينا حب الشهادة، ومدد.. مدد.. مادددددا ده النصر محتاج للجَلَد، وشدى حيلك يا بلد.

أستحضر الكبير محمد نوح دوما من الغياب، كثيرا ما أستحضره فى أيام الشهادة، مصر تعيش أيام الشهادة، مواكب الشهداء تمر بالكفور والقرى، تشيعها الزغاريد، يزفونهم بالهتاف، لا إله إلا الله الشهيد حبيب الله، ومصر تستقبل صامدة صابرة محتسبة جثامين أولادها، ترسمهم شهداء.

صوت نوح يتردد بكلمات الشاعر إبراهيم رضوان فى القلوب يدميها، وكأنهما كانا يستشرفان الغيب، تركا لنا أغنية للشهداء، غنيا الأغنية ليخلدها لهما الشهداء، وتلون كلماتها دماء الشهداء.

نوح كان يزعق فينا من أعماق قلبه العليل، ويزمجر فى الفضاء، يدمدم غاضبا، ويرق لحظة، تترقرق الدموع من عينيه على وقع كلماته، تسيل على الخدود، ينبثق العزم منه صاعدا إلى أعلى، نتمنى وراءه الشهادة، ونطلبها لنا ولأولادنا من بعدنا، بلد الشهداء، وطن الشهادة.

ليست آخر الأيام الصعيبة، وشهداء العريش أمس ليسوا آخر الشهداء المكتوبين فى اللوح المحفوظ، طابور الشهداء يطول من العريش إلى رشيد، ومن رفح إلى الفرافرة، والليل أبدا لن يطول، وسيشرق حتما فجر جديد، وبُكره الوليد جاى من بعيد، راكب خيول فجره الجديد، يا بلدنا قومى واحضنيه، ده معاه بشاير ألف عيد.

نوح بكلمات رضوان لا كان بينجم ولا بيضرب الودع، داس فينا على الوجع، والألم، نوح لم يتركنا للحزن، يلومنا أن كسرنا الحزن، الحزن هيفيدك بإيه، ينادى الحبيبة الحزينة مصر الكبيرة، يا بلدنا سيبك م الدموع، قومى اقلعى توب الخضوع.

الحزن فى القلب، وبالدمع جودى يا عين، وكل دمع تسيل تحفر فى الخدود أخدود ينزرع فيه الأمل، الحزن هيفيدك بإيه، يا سكة مفروشة بأمل، مشوارنا حُطّوا العزم فيه، ومدد.. مدد.. مدد.. وشدى حيلك يا بلد.

وإن كان فى أرضك مات شهيد

فيه ألف غيره بيتولَد

بُكره الوليد جاى من بعيد

راكب خيول فجره الجديد

يا بلدنا قومى واحضنيه

ده معاه بشاير ألف عيد

قومى انطقى وسيبك بقا

من نومة جوا فى شرنقة

ده النصر محتاج للجَلَد

ومدد.. مدد.. مدد

لو كان فى قلبك شىء قوليه

الحزن هيفيدك بإيه

يا سكة مفروشة بأمل

مشوارنا حُطّوا العزم فيه

يا بلدنا سيبك م الدموع

قومى إقلعى توب الخضوع

ده الحق لسه بيتجلد

ومدد مدد.. مدد مدد

مدد مدد.. مدد مدد..

شدى حيلك يا بلد.
نقلا عن المصري اليوم