عزيزتي المزة العصرية

أمل محمود
- والله الشعر الكيرلى اشيك ١٠٠ مرة من الشعر المسحلل اللى منقوع فى الزيت ومضروب بالشبشب.
 

- مش علشان اتحجبتى غصب عنك ونفسك تعبرى عن انطلاقك، تتحولى لمهرجان ألوان محشور جوا كارينا.
 

- مافيش حاجة اسمها لفة طرحة "سبانيش" الاسبانيات بيمشوا بالبكينى طرحة ايه اللى هيلبسوها؟؟ دى لفة ام عبده وكنت بشوفها زمان، كفاية بقى نحمل الأجانب كل بلاوينا.
 

- لفة الطرحة اللى بتخللى رأسك كبيرة ككائنات الفضاء مش هتقنع اللى اودامك ان دماغك كبيرة فعلا او ان شعر البت اوعى "ربانزل" يا خواتى ومش عارفة توديه فين.
 

- وبالنسبة للقصة الصفرا اللى باينة من الطرحة، ماشى عرفنا يا ست المحجبة ان شعرك اصفر وناعم، يعجبنى منطق مسك العصاية من النص.

- لما بتحطى الموبايل فى الطرحة دة بيطرح سؤال طب يا ترى الايباد بتحطيه فين؟؟
 

- البنطلونات ال "skinny" مش بتبينك ارفع ولا حاجة بالعكس بتحول رجليكى لشيئ أشبه بقمع الشاورما، وبتخلى الراجل لما يشوفك يجوع ويبقى نفسه فى ساندوتش.
 

- البلوزات اللى بحمالات على بودى كارينا بتبقى عاملة زى اللى لابس فانلته فوق البدلة.

- كارينا نجحت في انها تقنعك ان ذراعك لو بان عيب لكن لو اترش احمر او اصفر عادى..
 

- والبيبى دول برضه مابيتلبسش على كارينا وبنطلون، كلنا عارفين انه بيبى دول على فكرة.

- الفستان على البنطلون الجينز زى جاكت البدلة على البوكسر الكاروهات، الاتنين غلطة لا تغتفر.

- المكياج اتعمل لرسم صورة حلوة مش لتحويلك لذكية زكريا.
 

- الايبوليتات تحت البلوزات الشيفون رجس من عمل الشيطان فاجتنبوه.
 

- الأخت اللى بتمشى فخورة جدا بـ.... ومصدراهم للشعب، يا حبيبتى انتى انسانة مش فرخة بيضا في مسابقة للصدور المخلية.

- اهم من كل اللى انتى لابساه، الصابونة ومزيل العرق.. خنقتونا.
 

- نظارة الشمس مش توكة تلمى بيها شعرك ولا دليل على الروشنة، دى وظيفتها الوحيدة انها تحمى عنيكى من الشمس.

- الرموش الطويلة حلوة مافيش كلام لكن رموش بريش ورموش بتخبط في حواجبك دي بتفكرني بالعجوزة أم منقار وناقص تنتشي رمش للي أودامك وانتي بتقولي له "مش خسارة فيك رمش من رموش عينية" بنفس آداء العجوزة أم منقار.
 

- مفاجأة! مش اى ألوان تتلبس مع بعض بتطلع حلوة، ساعات بتبقى نوع من انواع التلوث البصرى.
 

- بالنسبة للى بيلبسوا الطرح الفسفورى، انا مش ضد الفوسفور لكن انتى المفروض محجبة علشان الشعر ملفت طب وبالنسبة للألوان الفسفورى اللى الهدف من استخدامها في الشوارع هو لفت الانتباه.. دة عادى؟ أعتقد في الحالة دى ان الشعر الأسود المكركت أو حتى البنى الليس أرحم بكتير من إشارة "قف أنا مزة".

- اختارى لون العدسات اللى يليق عليكى علشان مايبقاش شكلك واحدة ملبوسة هربانة من فيلم رعب.
 

- البوت الطويل موضة دا أكيد لازم يكون مناسب لمقاس رجلك، فكون رجلك مليانة ومابيطلعش لفوق زي ما هو مكتوب له، بيدي انطباع للي أودامك ان رجليكي متجبسة أو نازلة طازة من سفينة الفضاء اللي راكناها في جراج البستان..
 

- البرا الغامقة تحت البلوزات الشيفون والبلوزات الفاتحة واللامؤاخذة الأندروير الغامق تحت البنطلون الأبيض بيخلينا نتأكد انك مش بس شاطرة ولابساهم، لا دانتي كمان ماعندكيش غيرهم فماتستغربيش لو لاقيتي حد بيتبرع لك بطقم فاتح، لو دا هدفك يبقى برافو نجحتي..
 

- الظوافر الطويلة آوى دى ماشوفناهاش من ايام الساحرة الشريرة والمصيبة انك بتقعدى تهرشى بيها وتنضفيها اودام الناس، ابقى خللى معاكى دايما أكياس بلاستيك علشان لو حد حب يرجع وللا حاجة.
 

- وقبل ما تجيبى المانيكير هاتى الأسيتون، المانيكير المقشر هيخلى اللى انتى بترسمى عليه بدل ما يطلب ايدك، كبيره هيبوسها ويحطها جنب الحيطة.

- الشرابات: كائنات بتتغسل عادى جدا.
 

- مش اى موضة تلبسيها حتى لو مش لايقة عليكى لانها بتجيب نتيجة عكسية.
 

- وفى كمان نوعية مراتى مدير عام بتبقى سالفة لبس أبوها تقريبا وناقص لها الشنب.

نحن بحاجة الى بوليس للأزياء يقفش الناس دى :)
 

والله الموفق والمستعان