بقلم: رمزى لوقا
وعدَّى الليل
وفـَجْرك يا وطن شقشق
وجاى نهار فى ضَـيُّـه الحلم متعشق
فى فردوسِـك
يا حرية طيور المجد بتزقزق
وترسم صورة بالأفراح وطن بالفخر متزوق
ورايته غنوة للمدَّاح وزى النسر بيحلق
شباب طاير بأحلامه براح العمر قُـدامه وفى للعهد لو يعشق
شباب إصراره إلهامه وخوفه تحت أقدامه لابد الوعد يتحقق
محى للماضى أزلامه وكًسَّر كل أصنامه وطـن بالثورة يتخلق
فدى بالدم أوطـانُـه وعـلا بروحه بُـنيانه وصُوته الحُر يصرخ : لأ
لا نُسكُـت يوم ولا نطاطى
هجرنا حِـسّـنا الواطى
ونجهر كُـلنا بالحق
نغنى لمصر أغنية نِعلـّى الصوت بـِحُرّّّّّّّّّّّية
ونبنى وصفـّنا واحد وعمر ما صفـّنا ينشق
حذارى يا بلـدى من الفاسدين
ومن يسعى مع الحاقدين
يحاولوا يضربوا الأسافين
ها نخسر لو وتد يندق
نعق فى الغرب غِـربانـُه نطق فى الشرق
دبانـُه شهيدنا حى فى ميدانـُه لا بيغرَّب ولا يشَـرَّق
غرب و شرق يتآمروا
على أحزانّـا يتسامروا
وناس عشمانة بيغامروا
صديق غشاش ولو يصدق
ِصبـِرنا كتير كما أيوب
وطـوِّبْـنا اللىّ بات مغلوب
وآمنـّا \" الخنوع مكتوب \"
لا دار يأوينا ولا ملجأ
فهمنا نظامنا بالمقلوب
وقال سلطانى بات مرهوب
ولو يرمونى يوم بالورد ها سيب المركبة تغرق فأسقطنا النظام بالطوب
وحققنا اللىّ كان مطلوب
شبابنا عاشق الأوطان لا يحرق فيها أو يسرق

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :