(عــلامــــــات ...شعر)
بقلم: هاني رمسيس
زمان ...
شاف الدم و عبر
بسيفه و طيفه ، و مَرّ
شاف الدم و اعتبر
اللى عليه العلامة حُرّ
*****
و زمان ...
اتبدِّّل النحاس و الدهبْ
و صارت العلامة خشبْ
منها الشيطان ارتعبْ
و الموت بيها ، انغلبْ

لما عليها المسيح انصلبْ
و دمه سال و انشربْ
*****
و زمان ...
مرقس سافر لمصر
أسد بجناحين نِسْر
لا فـ إيده سيف
ولا فـ خياله قصر

بس كان حامل بشارة
عن زمن وعصر
و إنجيل وعود
بفرحة وغلبة و نصر

و فـ يوم حزين
ما لوش قمر
سال دم مرقس
صبغ الحجر

يروى الصحارى
و البرارى و الشجر
يزرع قلوب الناس
حُب ، يطرح بشر
*****
و زمان ...
غرّق الدم الشوارع
غطّّى العتّبْ
لوّن حبوب الرمل
طال الّرُكبْ

تلّم سيوف الجلادين
راح صليلها مـ التعبْ
جَلجِل صهيل الخيل
وقع الفرس و انقلبْ

يومها اتسطر تاريخ
و عـ القلوب انكتبْ
*****
وزمان ...
هجم الجراد
زى نار فى الحطبْ
تشهد نجوم السما
و الكواكب و الشُهُبْ

ما عاد فى السنابل قمح
ولا الكروم فيها عِنبْ

جفف ينابيع النهر
 سجن السُحُبْ
يبّس ضروع البقر
حرق الكتبْ

خَرَس الشفايف
واللسان اتعربْ
الدم عـ الموائد
و العلامة عـ الرقبْ
*****
و الليلة ...
الدم بحر هايج
مالوش حدود
الدم نيل و فايض
من غير سدود

الدم بركان انفجر
وقت السجود
جوة فى الكنيسة
و الملايكة شهود

الدم  فـ الشوارع
يسقى الورود
كحّل عيون الصبايا
زوّق الخدود

الدم عـ المنارة
يِكَسّر القيود
 الدم حامى بيصرخ
 فين العهود

الدم بينزف دموع
تمحى الوجود
الدم مِزود ميلاد
طفل الوعود
****
الليلة ...
شاف الدم وعَبَرْ
بعيونه ، و حلقه مُرّ
داس الموت و انتصرْ
و اللى فـ ايده العلامة حُرّ
----------------------------------------------------------------
عَبَر (فى البيت الأول) : من العبور وتعنى جاز .... عَبَر (فى البيت الأخير) : من العبرات و تعنى أدمع و بكى .... انشرب : والمقصود فى سر الإفخارستيا .... الرقب : الرقاب  ... أسد بجناحين نسر : يُرمز لمرقس بأسد مُجنّح .

يناير الحزين

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :