شعر /حنا عادل النجار
الساعه دقت سته
صفاره الباشا بتدوي
ف المكان ف كل حته
صوات وصريخ وبكي
كرابيج ع ضهر الغلبان
ولا عمره ف يوم اشتكي
ضحكته فوق حصانه
والسنيورة بتوسوسه ف ودانه
ضحكتي هتكمل لو دوست عليه
وهو قاعد ف مكانه
سرح الغلبان بتفكيره
ودار حوار
بينه وبين ضميره ؟
كان حوار طويل عاكس
الغلبان راضي بحاله
بس ضميره هو المشاكس
وعنده حق ؟؟
اصل جرس الكرامه
خلااص دق
اصل الفرق بين بشوات
اليومين دول
وبشوات زمان
زمان كان الباشا باشا
والغلبان غلبان
زمان كان يجيبله حقه
ولو هيطلعله اللقمه من بقه
الغلبان زمان كان ينام
مجبوور الخااطر
علشان الباشا كان بيقوله
ع كل حاجه حااضر
بشوات زمان كان كلهم هيبه
ولا عمرهم متطلع منهم العيبه
اما بشوات زمانا
فربنا يصلح حالهم وحالنا
بيدوسو ع الفقير بالجزمه
كانه رماد سجارته
الي خلاص مالوش معاه اي لازمه
بيتلزز باهانته
علشان هو الباشا
الفرحان بمكانته
بيقبضه شويه ملاليم
وقدام البشوات
الي من توبه
عامل فيها الباشا الكريم
الغلبان ده مالوش علاج
ف عز الشتا
بيكون دفاه العاج
كل ذنبه انه اتولد
غلبان؟
لا ف يوم حلم يبقي باشا
ولا حتي فنان
طيب يبقي ايه ذنبه
انه كل يوم يتهان؟
علشان مش معاه فلوس
وانت فرحان بالي معاك
وبشويه النفوس
حرام عليكم
كفايه غرور
دي محبه المال
الاصل لكل الشرور
وبص لنهايه المغرور
متر ف متر كفان
وقبره من ظلمه
بيطلع منه الدخان
عضو نادي الشعر والادب
