ولم نزل مع المستسهلين

د. مينا ملاك عازر
أزمة هذه البلد الحقيقية أن مسؤوليها لا يريدوا بذل المجهود، ولا أقصد هنا ذلك المجهود البدني الذي كان يبذله الباشمهندس إبراهيم محلب فقط، ولكن أيضاً المجهود في التفكير بذل الجهد في الدراسة والتفكير وقد أشرت لحضرتك سابقاً في عدة مقالات عن مسؤولين جنبوا أنفسهم الجهد في التفكير واستسهلوا فلبسوا البلد كلها في الحيط، وأحدث هؤلاء المسؤولين وليس آخرهم للأسف لأنهم ما بيخلصوش رئيس هيئة المترو حين قال للرئيس والدموع تغالبه إحنا بنخسر 157 مليون سنويا ومش لاقيين فلوس لصيانة المترو والحل الوحيد إننا نزود سعر التذكرة فصعب على الرئيس وأذن له بمضاعفة سعر التذكرة.
- ما قالشي نعمل أكشاك صغيرة منظمة على محطات ورصيف المترو يتم تأجيرها . آهو بالمرة نلم البيع العشوائى إللي في محطة زي العتبة ورمسيس .
- ما قالشي نطلع نشرة صغيرة نبيعها ب2 جنيه عن المترو ومحطاته وخطوطه والمحطة الفلانية بتوصل الناس لفين ومنين.

- ما قالشي ندخل نظام جديد يحسب عدد محطات كل راكب فتبقى الأجرة على حسب المحطات، وما يتحاسبش أبو محطتين زي أبو عشرين.
- مقالشي نأجر حق البث الصوتي لأي من الإذاعات المنتشرة حالياً عشان تبث جوه المترو، أو التليفزيون لأي قناة فضائية خاصة.
- مقالشي نعمل في ساعات محددة في اليوم (في ساعات غير الذروة) رحلات ترفيهية فيها سرعة وضوء ومؤثرات وفن.

- مقالشي نفرض غرامات فعلية علي اللي مش معاه تذكرة لأن في معظم محطات الخط الأول والثاني مفيش أي رقابة على التذاكر وكتير من المحطات فيها مكن التذاكر مش شغال ما يجعل حوالي أربعين في المئة من مستخدمي المترو يستخدمونه مجاناً.

- ما قالشي نستخدم إعلانات المترو بطريقة أفضل وبشكل احترافي بدلا من مجرد دهان الوان علي جدران المترو، ويمكن للمترو وضع اعلانات ضوئية متحركة وعودة دائرة التلفزيون في مترو الخط الثاني ونشر اعلانات عليها كمان ممكن يتم وضع إعلان بطريقه كويسة علي التذكرة بدل ما هي مصفره كدا.

- ما قالشي نعمل دورة مياه في كل محطة بتعريفة دخول 50 قرش أو جنيه خصوصاً وأن الهيئة مديونة للشركة القابضة للمياه بأربعين مليون جنيه.
- مقالشي أنا دماغي يا ريس مفيهاش أفكار وفاضية، هات مجموعة من الشباب المبتكرين وإللي لسه دماغهم فيها مساحة خيال وأفكار إبداعية لمشروع المترو تسعد الناس وتدخل ملايين.

لكن صاحبنا رئيس الهيئة اختار الحلول السهلة وقال نزود الأجرة ياريس ونشغل للناس موسيقى فينبسطوا نفس الفكر بتاع الأنظمة العاجزة عن الأفكار والحلول لكن للأسف الوقت ده محتاج ناس بتتعب نفسها  وتفكر.

المختصر المفيد ياتشتغلوا ياتستقيلوا.