عمرو أديب يرد على سالم عبدالجليل بعد تكفير الأقباط: "داعش تلاميذكم"

كتب - نعيم يوسف
استنكر الإعلامي عمرو أديب، تصريحات الشيخ سالم عبدالجليل، والتي زعم فيها أن الأقباط كفار  وسيذهبون إلى الجحيم، موضحًا: "ده مش أول مرة نسمع الكلام ده".

وتابع "أديب" في برنامجه "كل يوم" المذاع على قناة "أون إي" الفضائية، مساء الأربعاء: لدي سؤال عقلي بعيد عن الشريعة والسنة، المسيحيين "بقالهم 2000 سنة في مصر إية الفكرة نناقش السنة دي إنهم كفار؟؟ والسؤال التاني: إية الفايدة؟؟ إحنا استفدنا إية؟؟؟ ولكن الأضرار كثيرة جدا، وإية اللي عاد على أمة الإسلام إن المسيحيين كفار".

وأضاف: "أفهم إنك تحضني على الجهاد في العمل، والعطف على اليتيم، وإية الميزة في مناقشة ده دلوقتي"، متابعًا: "وبعدين الراجل مصر بطريقة غريبة جدا.. ما تسيبوا الناس في حالها، أنت حر، ولكن كل يوم الصبح تصحى تقولي يا كافر، أنت عايز  تعمل إية".

ولفت مقدم البرنامج إلى أنه ضد قانون إزدراء الأديان، ولكن "دا أسمه إية؟؟ أنا عارف إنه فيه ناس بتكره الأقباط، إحنا بنزوده؟؟ حط نفسك مكان المسيحي.. طب انت بتعاملني كدة لية؟؟ هو أمتى المسيحيين داسوا على طرف لأي حد؟؟".

وأكد "أديب": "انتوا تغلبوا 100 داعش، داعش دول تلاميذكم، دا أنت عالم.. يعني إية تعاملهم كويس دول مواطنين.. يا أخي ارحمنا وأرحم البلد"، لافتًا إلى أن الدولة لن تسقط إلا بعد أن يتم تقسيمها.