منى برنس تجيب على أصعب الأسئلة: عائلتي لن تمنحني أصواتها.. وسأتفاوض مع "نتنياهو" بهذه الطريقة

منذ أن أعلنت منى برنس، نيتها للترشح لإنتخابات رئاسة الجمهورية 2018، وإنهالت عليها عدة أسئلة من قبل متابعيها على صفحتها الشخصية على موقع التواصل الاجتماعي "فيس بوك"، والتي أثارت إعجابها مما أدى إلى دفعها للإجابة على البعض منها.
 
وفيما يلي تقدم "الفجر" أبرز الأسئلة التي طرحها رواد "فيس بوك" على الدكتورة الراقصة منى برنس، والتي منعت الأحاديث الصحفية خلال الفترة الأخيرة تزامنًا مع إعلان نيتها للترشح لإنتخابات رئاسة الجمهورية.
 
- ترشحتي لإنتخابات الرئاسة 2018.. ما مؤهلاتك لذلك؟
أنا مواطنة مصرية حاصلة علي دكتوراة الدولة في الادب، كاتبة و مترجمة و عندي رؤية للحياة وعندي حلم ان مصر ترجع مصر تاني، أكيد ماعنديش خبرة رئيس سابق ولا أي رئيس تولي حكم مصر قبل كدة كان عنده خبرة أو مؤهل رئاسي.
 
- هل شايفة إنك هتقدري تمسكي الجيش المصري وتسيطري على موقف مثل الإرهاب في سيناء؟ وما مؤهلاتك للجلوس على طاولة واحدة مع نتنياهو وتتفاوضي، هل سبق و دخلتي اي مفاوضات من اي نوع؟
وزارة الدفاع مهمتها الدفاع عن مصر أيًا كان مين اللي ماسك الحكم.. دي عقيدة الجيش المصري.. وفي مفاوضين مصريين دوليين، مش لازم انا اللي افاوض بنفسي.. وان كان اقدر، وأقدر جدًا كمان.
 
-  لماذا نشرتي فيديو راقص اليوم كدعاية لحملتك الإنتخابية؟
بخلخل بعض التصورات و المفاهيم عند الناس.. عن الحياة في العموم.. وعن تصور كتير من الناس إن رئيس أو رئيسة البلد ده اله يقدر يحل كل المشاكل وينزل ببرنامج سحري في يوم و ليلة.. ده حتي ربنا حسب النص الديني خلق الدنيا في ست ايام.. و متهيألي وقتها كانت الدنيا بسيطة و اقل تعقيدا و اقل ازدحاما من انهاردة.
 
رئيس أو رئيسة البلد من وجهة نظري.. مش اله.. هو أو هي منسق يعني اختار فريق عمل، وفريق العمل يختار فرق عمل آخرى من المتخصصين في كل المجالات يحط برنامج و نشتغل عليه و نطوره.. في مدة زمنية معينة.. وننسق بين الإدارات و بعضها، ويتعرض علي الحكومة، علي مجلس الشعب.. وده شغل لمرحلة تالية.
 
دلوقتي انا بقدم نفسي كمرشحة لرئاسة مصر ٢٠١٨ بمفهومي و تصوري.. وحق الترشح للاخرين والاخريات بمفاهيم و تصورات تانية مكفول للجميع.. بس انا شخصيا من انصار نظرية " ابدأ بنفسك.. حب نفسك .. ساعد نفسك"... كبداية لاي شغل.
 
- حال فوزك بالرئاسة مع من ستعملين؟
أكتر ناس هشتغل معاها هي الناس اللي أنا مختلفة معاهم في الآراء.. وطرق العمل.. عشان أنا ما بحبش الاتجاه الواحد او المين ستريم.. ما عدا الهوية .. المصرية.. كلامي واضح مصر للمصريين .. وأهلاً بكل اللي هواهم مصري.
 
-  هل عائلتك ستمنحك أصواتها في إنتخابات الرئاسة حال قبول ترشحك؟
لما رشحت نفسي في ٢٠١٢، امي قالت هترشح عمرو موسي، و ابويا اختار حمدين صباحي.. دلوقتي بقولهم رشحت نفسي.. أمي خايفة يسحبوا منها بطاقة التموين، وأبويا خايف أمن الدولة ييجي يقبض عليا.