المدرسة «صبري فواز»

بولا وجيه 
فكرة أن ممثل يعرف يخطفك من أول لقطة يمكن ممثلين أو مشخصاتية بمعنى أدق معندهمش الملكة دي حالياً.

 

بقت نادراً ده في حالة لو موجودة أصلاً عند كام واحد بالعدد، وخصوصاً أن رمضان السنة دي حالل ومعاه مسلسلات أكتر من عدد سكان قطر الصراحة، فصعب تقدر تتفرج وتحكم على كل اللي مشاركين في رمضان السنة دي من أعمال.

 

لكن أنا حابب أقف النهاردة عند شخص بيخليني لما حظ بيسألني أنت بتتابع مسلسل إيه؟؟، يكون الرد هو أسم الممثل مش العمل نفسه، خلاص أنت بتتفرج على المسلسل علشان بس الممثل ده فيه مش علشان القصة أو كده، لا ده برنس يخطفك وميخلكش تركز مع اي حاجة غيره.

 

صبري فواز -مع حفظ الألقاب- في أول يوم رمضان والدتي اتصلت بيا تسألني أتفرج على إيه في رمضان؟؟، قولتلها صبري فواز، قعدت تدور أول يوم على مسلسل باسم صبري فواز في كل القنوات مش لاقياه، اتصلت بيا تهزقني وتقولي مش لقياه، قولتلها يا ماما أنا أقصد أي مسلسل فيه البرنس صبري فواز اتفرجي عليه.

 

أول يوم أول ما حلقة رمضان كريم نزلت قولت هو رمضان كريم فعلاً، إيه الجمال اللي في دوره ده!، تحسه حد مبيتعرضش عليه أنه يقبل دور، لا ده بيتعرض عليه يتلبس من عفريت الشخصية، ما أصل ده واحد مش طبيعي، ده كفاية تعبيرات وشه وهو ساكت أو حتى بيتكلم.

 

مش بعيد كمان كام سنة نلاقي مدرسة في التمثيل بأسمه، ومش بعيد أني اتمنى الاقي ناس كتير ضمن مدرسته دي.