أديب: الشعب مش عارف مكان جزيرة الوراق هيعرف مكان تيران وصنافير؟

كتبت – أماني موسى
قال الإعلامي عمرو أديب، أنه يعتقد أن موضوع جزيرتي تيران وصنافير سينتهي دون أن يعلم أحد حقيقة الأمر، مستنكرًا ما قالته المستشارة هايدي فاروق بأن لديها وثائق ومستندات تثبت مصرية الجزيرتين، بينما لم تتقدم بأية مستندات تدلل به على صحة كلامها.

الشعب لا يعرف مكان جزيرة الوراق فهل يعرف مكان تيران وصنافير؟
وأضاف أديب في برنامج كل يوم، المقدم عبر شاشة أون تي في، أن الشعب لا يعلم أين تقع جزيرة الوراق على الخريطة، فهل يعلمون بمكان تيران وصنافير!


أديب: هو مفيش حلول غير أننا نجيب البلد عالأرض؟
وأستعرض أديب فيديو لاشتباكات من داخل البرلمان، بشأن الجزيرتين، مستنكرًا ما طرحه البعض بأن الاختلاف حول تيران وصنافير سيخلق 25 يناير جديدة، متساءلاً: هو مفيش غير أننا نجيبها عالأرض؟ مفيش سيناريو تاني؟

أديب لقناة الجزيرة: مالكمش دعوة إنتو باللي احنا فيه.. دي قضية بناقشها وهاتخلص"
وتوجه أديب برسالة شديدة اللهجة إلى قناة الجزيرة القطرية التي تقوم بالتحريض بشأن الجزيرتين، قال فيها: أن هناك بعض العناصر تستغل أزمة قضية تيران وصنافير للتدخل في الشأن المصري، مشيرًا إلى أن جميع العناصر المختلفة في القضية هم مصريون ولديهم إحساس وطني.

ولكن بعض عناصر الإخوان وقناة الجزيرة تحاول استغلال الحادث قائلا: «فيه ناس عاوزة تصطاد في المية العكرة»، وشدد قائلاً: "ملكمش دعوة إنتو باللي احنا فيه.. دي قضية بناقشها وهاتخلص".

أديب: هو هيثم الحريري كان بيخلع الجاكيت ليه؟
كما أستنكر أديب فيديو الاشتباكات التي وقعت بين النواب والتراشق اللفظي، وكذا قيام النائب هيثم الحريري بـ "خلع الجاكيت" أثناء اشتباكه مع نائبة، متساءلاً: "هو كان بيخلع الجاكيت ليه؟ كان ناوي يعمل إيه؟".

وأضاف قائلاً:"هيثم الحريري قلع الجاكيت وقالها انتى أمنجية، يعنى بتشتغل مع الأمن وعميلة يعنى، ودا نظرية هيثم، وهى قالتله انت بتقبض يعنى بيشتغل مع دولة أجنبية".


أديب: المجلس كله عملا وأمنجية؟ أنتوا عايشين إزاي كدة؟
مستطردًا، "قاعدين مع بعض ازاى، أمنجية وعملاء، هو ده المجلس؟، لما هيثم قلع الجاكيت كان ناوى يعمل إيه في الست، لو كانوا سابوك كنت هتعمل ايه؟، دلوقتى أنا كمواطن عاوزنى أعمل ايه؟ انتو ازاى عايشين مع بعض كده؟".

مردفًا، "أنا بشوف حاجة ميكس، لا هو اشتراكي ولا هو ديمقراطي، لا هو حزب واحد ولا تعدد أحزاب، هو حاجة كده، قالها بشنب ولا غير شنب يا زينب قالتله بين البينين".


كلنا مصريين وكلنا على حق
وتوقع أديب أن تستمر حالة الجدل واللا اتفاق بشأن الجزيرتين وأردف قائلاً: "بقول لحضراتكم وأرجو توقعى يطلع غلط، إحنا مكملين فى السكة دى للآخر وهتخلص على كده، أنا بريحكم، عشان محدش يقعد مستني الماتش للآخر، وأنت بقى بمجهودك للآخر اقعد اقرا واستفتى قلبك بقى"، مشددًا: " مصارين البطن بتتخانق، كلنا مصريين وكلنا على حق، وكل واحد من حقه يقول ما يعتقده حق".