الكدب مالهش رجلين في البلدان الكبيرة

د. مينا ملاك عازر
 اليومين اللي فاتوا ظهر تطور جديد أعتقده خطير في مسألة التدخل الروسي في الانتخابات الأمريكية، التطور ده بدأ الأسبوع اللي فات لما صحيفة نيويورك تايمز نشرت معلومات عن اجتماع سري دار في يونيو 2016 بين جي آر دونالد ترامب، إللي هو الابن الأكبر للرئيس دونالد ترامب، ومحامية روسية مقربة من الكرملين  اسمها ناتالي فيسيلنتسكايا،  ترامب الابن في البداية قال: آه فعلا قابلتها وكنا بنتباحث في مسألة تبني أطفال أيتام غلابة، وبعدين

النيويورك تايمز قالت لا،  المقابلة كانت بخصوص معلومات تضر بهيلاري كلينتون، فرد ابن ترامب وقال: آه فعلا كانت بخصوص هيلاري، وفيها إيه لما الواحد يقابل ناس من معسكر معادي لخصومنا في الانتخابات؟ وبالمناسبة أبي ميعرفش حاجة عن المقابلة دي، المقابلة تمت في برج ترامب في واشنطن، وعلى العموم أنا مطلعتش منها بمعلومات مفيدة، وبعدها نشر  نص الإيميلات اللي بينه وبين المحامية الروسية على أساس أنا ماعنديش حاجة أخبيها، وكده وبعدين أبوه ترامب الرئيس دافع عنه، وقال دي مجرد محامية روسية ومش تبع الحكومة الروسية ولا حاجة  لكن أول إمبارح في معلومات مؤكدة إن في

شخص تاني كان موجود في لقاء ترامب الابن والمحامية الروسية، وترامب الابن ما جابش سيرته، الشخص ده اسمه رينات أخمشتين وهو أمريكي من أصل روسي بيشتغل في المحاماة وظهر اسمه في قضايا مرفوعة في محاكم الولايات المتحدة لرفع العقوبات الأمريكية عن روسيا باعتبارها انتهاك لحقوق الإنسان، إضافة إنه اشترك مع ناتالي فيسيلنتسكايا  في الدفاع عن متهمين في قضايا غسيل أموال مصدرها روسيا، لكن النيويورك تايمز بتلمح إن أخمشتين عميل للمخابرات الروسية بس هو قال إمبارح في حوار مع وكالة الأسوشيتد برس : والله ما حصل ده أنا كنت مجند في جيش الاتحاد السوفيتي في الفترة من 1986 لـ 1988 والوحدة اللي خدمت فيها كانت في دول البلطيق  وكنا بنشتغل على جمع معلومات مخابراتية مضادة بس ما اتدربتش على أعمال التجسس، بس في الحقيقة أخمشتين اعترف على شخصين مهمين حضروا اجتماع يونيو 2016، وترامب الابن ماكنش جايب سيرتهم، والشخصيتين هما جاريد كوشنر زوج إيفانكا ترامب وبول مانافورت مدير حملة ترامب الانتخابية.طبعا دلوقتي في أكتر من سؤال بيفرض نفسه في الصحف الأمريكية، يعني إيه محامية مقربة من الكرملين؟ يعني إيه طبيعة التقارب ده بين المحامية والقصر الرئاسي الروسي؟ وإذا كان ترامب الابن مقالش لترامب الأب حاجة عن مقابلته مع المحامية الروسية، فهل كوشنر ومانافورت كمان مقالوش؟! بالمنطق كده لا طبعاً،  عشان كده لجنة المخابرات في مجلس الشيوخ مورية لترامب العين الحمرة ومنظرها كده ناوية له على نية سودة.المختصر المفيد ليس خفي إلا ويعلن.