بالصور.. حوادث متعددة في أقل من أسبوعين لشركة جو باص وتعطل أتوبيس بالغردقة والشرطة تنقذ الركاب

تداول عدد من النشطاء عبر مواقع التواصل الاجتماعي واقعة مع شركة جو باص، لنقل الركاب، يقول بيتر: أن شركة gobus لنقل الركاب من القاهرة للغردقة و أماكن ساحلية اخرى زى إسكندرية و الساحل الشمالي و شرم الشيخ قررت تشترى عدد ٣ أتوبيسات دورين شكلهم يبدو أنه نضيف لكن المفاجأة ان الشركة تقريبًا مش عارفة تدير الأتوبيسات او حتى تشغلهم!
 

أضاف عبر حسابه الشخصي على الفيسبوك، انهاردة اتحركنا فى باص رقم ٥٠٤ اتوبيس عام البحر الاحمر رقم الرحلة 677409 المتوجهة من الغردقة للقاهرة الساعة الواحدة ظهراً !

 

١- الأتوبيس ده مخصص لأعلى درجة ( elite ) و تمن التذكرة الواحدة ٢٩٠ جنيه و دى اعلى درجة موجودة فى الشركة 

٢- الأتوبيس أتأخر ١٥ دقيقة و اتحركنا الساعة ١،٣٠ ظهراً لحد ما الناس حطت شنطها و ركبت !

 

٣- بعد ما اتحركنا بأقل من ساعة واحدة تعطل الأتوبيس عند كمين الأحياء و على بعد ٢٠ كيلو فقط من الغردقة !
 

٤- سواق الأتوبيس من غير إلقاء اللوم عليه قالنا فى مشكلة فى كهربة الأتوبيس و ان فيه لمبة حمرا كانت منورة و هو بيتحرك و قدامنا على الأقل ساعة لحد ما يجيى من ال head office للشركة فى الغردقة !
 

٥- احنا دلوقتى واقفين فى الصحرا على طريق سفر و محدش بيعمل اى حاجة كالعادة و معانا أطفال تعبانين من الحر و كبار سن فى منهم الى عيان و عندوا مواعيد أدوية !

 

وتابع بيتر، النقطة الإيجابية الوحيدة فى الموضوع واللى أنا مستغربها أن الشرطة وصلت بعد دقيقتين بالظبط و فيه ملازم أول اسمه سعد محمد من قوة تأمين الطرق فضل واقف معانا لحد ما حد يتعطف علينا من الشركة المحترمة.
 

*ملاحظة مهمة جداً : الباص التانى اللى الشركة اشتريته لسه عامل حادثة على طريق العلمين دخل فى مقطورة ربنا يستر على الباص التالت و على تعساء الحظ ركابه ان لم تتوقف هذه المهزلة !
 

Gobus والله على المجهود و الابداع خلال أسبوعين عاملين رقم قياسى فى الحوادث استمروا!
 

وشدد بيتر، المطلوب من الشركة اعتذار رسمى و فورى من الشركة و التحقيق فى المهزلة اللى بتحصل و تعويض كل الركاب عن المستوى المزرى للخدمة !

 

* تحديث ١ بعد انتظار ساعة فى الطريق الصحراوى قرروا يرموا الشنط فى الشارع لحد ما يشوفوا هيعملوا اية حتى دون انتظار وصول الأتوبيس البديل !!!!!!!!
 

* تحديث ٢ ، الساعة ٤ يعنى بعد اكتر من ساعة و نص وصل اتوبيس من الشركة بدرجة او فئة اقل و السواق جاى بيقولنا يلا انقلوا الشنط و محدش بيتحرك من الناس اللى شغاله لحد ما بدأنا نزعق و نقلهم شوفوا شكلكوا ولا فالحين بس تطلبوا الشاى و انتوا بتحطوا الشنط فى الأتوبيس قدام الشركة !

* تحديث ٣ ، سواق الأتوبيس العطلان بيقولنا حصل خير و الشركة هتديكوا فرق التذكرة بين الدرجة ال ( elite) و الدرجة العادية !!!
 

* تحديث ٤ ، بسأل سواق الأتوبيس الجديد معاكوا ماية للأطفال بيزعق و بيقولى لأ يا باشاااا انت واخدين واجبتكوا فى الأتوبيس الاول !!! حد متخيل !

 

** تحديث ٥ حد تواصل معايا من الرقم ده 01201111919 اسمه احمد عزت من شركة @gobus و بيقولى ان كل واحد من الركاب هيسترد ١٢٠ جنيه اللى هو اصلاً اقل من فرق تغيير الفئة بين درجة ال elite اللى احنا دافعين تمنها و بين الدرجة ال economy اللى هما بعتوا منها الأتوبيس البديل و رديت بقولوا ان ده مش منطقى و مش مقبول من كل الركاب قفل السكة فى وشى !!!! شركة محترمة و موظفيها محترمين جداً !
 

** تحديث ٦ وصلنا عند مقر الشركة بمدينة نصر حالاً الساعة ٩ بالليل الأتوبيس وقف بعيد عند ضهر نادى السكة الحديد و جه واحد اسمه استاذ حنا بيعرف نفسه انه مدير فرع الشركة بمدينة نصر الاستاذ المحترم اول ما شافنى قالى انت بيتر أتكلم عن نفسك بس و بيتكلم بأسلوب مستفز ناقص يقولى انت اخوان مثلاً ! و عنده اصرار انه ينفذ التعليمات و يدى كل واحد ١٢٠ جنيه و اذا كان عاجبك مش عاجبك روح بلط البحر بقى لأ و الجديد بقى بنقولوا احنا رايحين مكتب مدينة نصر قالنا المكتب قافل اللى هو اصلا بيبقى فاتح ٢٤ ساعة اهم حاجة عنده انه مش عايز شوشرة فى فرع الشركة اللى هو مديره !
 

**** اخيراً المشكلة اتحلت بعد ما اتجمعنا قدام و داخل مقر الشركة الخاص بحجز التذاكر بمدينة مصر ، و بعد ما استاذ حنا استخدم كل وسائل الترهيب و التهديد لينا ، حس اننا مش هنتحرك من غير ما ناخد اخر جنيه لينا و لقى ان فيه ناس من اللى بتحجز تذاكر بدأت تتراجع و متشتريش و تمشى و ناس كتير من الركاب اللى مستنين اتوبيساتهم ولسه هيتحركوا بدأوا يتعاطفوا معانا بعد ما سمعوا تفاصيل المهزلة مننا ، المهم بالفعل استلمنا تمن التذاكر بشكل كامل من غير ما نتنازل عن جنيه و احنا كلنا شعور بالفخر اننا مسبناش حقنا ولا خوفنا من اى تهديد و اننا أخدنا فلوسنا كاملة غصباً عن عين اكبر واحد فى الشركة !
 

٧ رسائل هامة جداً

١- نشكر ربنا على حمايته و رعايته لينا و ان الأتوبيس عطل جنب كمين شرطة و محدش تعرضلنا و احنا فى نص الصحراء !
 

٢- شكراً للملازم اول سعد محمد من قوة تأمين الطرق على موقفه المحترم جداً و انه وقف معانا و كان بيحاول يساعد الاطفال بجد مش تمثيل !
 

٣- شكراً للبنات و الستات الجدعان اللى بمئة راجل اللى كملوا للاخر و على واسهم أمنية و الرجالة الجدعان اللى كان ضهرنا فى ضهر بعض و كملنا لحد ما أخدنا حقنا و على رأسهم مصطفى الجدع و كل الاطفال و كبار السن اللى كملوا و اتبهدلوا لحد ما رجعوا حقهم حقيقى اتشرفت بمعرفتكوا !
 

٤- بشكر جداً الناس اللى مشيت و اخدت اقل من حقها و رضيت بال ١٢٠ جنيه و كان نفسها تكمل مقدرتش عشان اطفالها و اللى كان عنده معاد قطر بيحاول يلحقه احنا كلنا مقدرين انكوا اضطريتوا تمشوا غصباً عنكوا علشان اهلكوا اللى اتبهدلوا فى الصحراء

٥- شركة جو باص منتظرين منكوا اعتذار رسمى فى بيان يتم نشره بشكل رسمى و اعتذار لشخصى و لكل ركاب الرحلة ده بغض النظر عن اننا مكملين فى حملة المقاطعة ليكوا !
 

٦- شكراً لكل الناس اللى عملت شير للبوست تفاعلكم صنع الفارق و اجبر الشركة على التحرك لحل الأزمة !

شكراً لبابا الله يرحمه لانه خلف راجل و علمه انه ميسبش حقه و لو على رقبته و لماما اللى فضلت مستحملة كل تفاصيل اليوم المرهقة و مطلبتش منى انى امشى و اكبر دماغى مثلاً لانها تعبانة من ٩ ساعات سفر.