الحب الحقيقي الممتع المريح

د.صمويل فكري
امتى الحب بيبقى حقيقي وممتع ومريح؟

لما يكون حد شافك وعنده شغف انه يعرفك اكتر وبعد ما يعرفك بكل تفاصيلك ومشاكلك وعيوبك وماضيك يتقبّل ده ويقبلك ويرضى باختياره وقراره انه يكمّل معاك مش عشان يساعدك كمنقذ لضحية او يسيطر عليك ويتحكم فيك كجاني ولا انت بتكون ضحية في معرفتك بيه لانك متقبل كل الم مفيد كبّرك وضار علّمك ماتكررش اخطائك وتغيّر نمط شخصيتك وتعرف نقاط ضعفك وعيوبك وتعترف لحد بيها وتشتغل عليها وتتغيّر.

قرر انه يكمل مش عشان هيقدر ينقذك واوعى تقبله لو هيتحكم فيك ويسيطر عليك من خلال معرفتك بيه.
 

قرر انه يكمّل عشان هو مش كامل زيك وعنده عيوب زيك وماضي فيه حاجات مؤلمة وصعبة لكنه عداها وكبر من خلالها وندم على أي ألم كان تأديب ونتيجه لسقوطه المتكرر وعدم قبوله للتغيير والتشكيل وتصحيح طرقه.
 

قرر انه يكمّل عشان هو إنسان بيشعر وحسّ حاجة من ناحيتك وانك مش زي إنسان عادي زميل او قريب او صاحب ليه لكن اعمق واكبر وهو انك هتكون رقم واحد في حياته وانه مفتخر ومتشرف بوجودك في حياته ووجوده في حياتك و وحدتكم وارتباطكم.
 

قرر انه يكمل مش بس بمشاعره لكن بمعرفته بيك فكّر وشغّل عقله واقتنع وجرّب معاك مواقف كتير وتصرفات كتير عشتوها مع بعض قبل اي قرار رسمي ولكن قدام الناس في النور وشاف فيك شريك لحياته وحد هيكمل معاه سكة حياته وهيحس معاه بالأمان والقيمة والأمل والفرح وهيشبعه ويكفيه ويعينه.
 

قرر انه يكمّل لأنه احتاج حد في حياته زيّك ومش بس مجرد احتياج لكن لقى الحد اللي ينفع يكفيه ويشبعه ويكون مصدر متعة وألفة ووحدة نفسية و روحية وجسدية وكمّل كمان لأنه مش عارف يكمل لوحده.

قرّر انه يكمّل لأنه لقى فيك الحد اللي بيدور عليه من زمان لما فكّر كتير مين يرتبط بيه وامتى وقال لناس لأ وأجل وقت طويل لحد ما لقاك ومسك فيك وما صدّق انه لقاك واتحققت فيك الشروط والصفات اللي كان بيدور عليها الواقعية والبشرية اللي مش كاملة وممكن تكون مش ثابتة مع تغير الظروف لكنه شايفك اجمل واعظم واغلى وافضل حد وده باين في تصرفاته وكلامه ومواقفه معاك وانت مالي عينيه وشاغل باله وقلبه بينبض بحبك ومشغول كله بيك.

 

قرر انه يكمّل ويتمسّك بيك لأنه آمن بيك يعني صدقك وصدق كل اللي قولته عن نفسك ليه وعنه كمان من كلام حلو وتعبيرات المحبة بلغاتها وصدق في قدراتك واحلامك ونجاحك وتحملك المسئولية و التزامك و وضوحك وصراحتك واتكونت مابينكم ثقة في بعض ماتهزهاش مخاوف او شكوك لأن كل يوم بتعرفه و واثق فيه ومؤمن بيه ومتمسك بيه وقابله بكل حاجة فيه ومش بتسيطر عليه او تتحكم فيه والايام بتبين حبه وانتماؤه واعجابه وإيمانه بيك.
 

قرر انه يكمّل لما لقى بساطتك وتواضعك وشاف انه في علاقتكم عايش نفسه وانت عايش نفسك ومش بصورة زائفة او شكل معين او صفات معينة مؤقتة بيرضيك بيها او بيلفت انتباهك لكن ماتكسفش يقولك نقط ضعفه وعيوبه وماضيه قبل ما يقولك مميزاته ونجاحاته.
 

الحب مش بس مشاعر وقناعة باللي بتحبه..
 

الحب مسئولية وإلتزام ناحية اللي بتحبه..

ساعة ماتكون صريح وملتزم وعارف هو ليه حبّك وشايف قد ايه بيحبّك وعرف هو ليه قرر سكمّل معاك وانت تكمّل معاه هاتستمتع وتشتقبل حب حقيقي وممتع ومريح مصدره ربنا وبيحطه فينا وليه معاني وانواع ولغات كتير.
 

حب ما بيكسرش او يجرح او يأذي او يخون او يسيطر او يتحكم او يشكك او يخوف او يفضح او يسخر او يفقد الامل او يتغيّر طالما وحدتكم ومحبتكم وارتباطكم عهد مش مجرّد عقد قدام ربنا والناس وفي النور!
 

اقتنعوا ببعض واكتفوا ببعض والتزموا ناحية بعض وحسّوا ببعض واهتموا وقدّروا احتياحات بعض واسمعوا بعض واقعدوا مع بعض وشوفوا بعض وشجعوا بعض واستحملوا بعض وسامحوا بعض وصدقوا بعض وماتظنوش السوء في بعض، ده كله مش هايحصل إلا بالحب لأن كله بالحب وكل الطرق بتفشل إلا طريق الحب!