شاب يلقن الشباب درسًا في كيفية التعامل مع "إخواتهم البنات"

تداول نشطاء على الفيسبوك منشور لرجل يشيد بشقيقته مؤكدًا أنه يمنحها الكثير من الحرية مع الثقة، مطالبًا أقرانه أن يحذوا حذوه في التعامل مع شقيقاتهم من البنات وألا يفرضوا سيطرتهم بالقسوة استنادًا إلى ما يفرضه المجتمع.
 

يقول الشاب ويدعى أحمد نصر:
 

"علي فكره دي سما اختي .. احنا دلوقتي في الشغل مع بعض .. معنديش مانع انها تحط ميك اب .. ماعنديش مانانع انها تلبس اللبس اللي هي حباه .. مابعترضش علي اي تصرف تعمله في حياتها الشخصيه لانها حياتها هي 
 

انا اللي بخرجها وبجبلها هدايا في اي مناسبه او من غير مناسبه .. فرحتها عندي هي راحتي النفسيه .. مابسبهاش لحظه حتي الشغل خليتها تشتغل معايا .. احنا مش اخوات بس .. احنا اخوات واصحاب وحبايب وعلاقتنا كلها محبه وضحك وهزار وخوف علي بعض. 
 

أنا عارف كل اصدقائها الشباب ومش ممانع أنها تصادق شباب لأني مؤمن بالصداقة بين الولد والبنت .. غير إني واثق فيها ثقة عمياء وهي أد الثقة بتاعتي. 

مابندخلش بينا أي حد يحاول يوقع بينا ولا يشوه صورتنا مهما حصل.. أنا عارف هي إيه وهي عارفه أنا إيه.
 

الأخت عمرها مابتتعوض والناس اللي من دمك هما النعمة اللي موجودة في الحياة من غيرهم الدنيا هتبقى قاسيه اكتر ما هي قاسيه ومش هتلاقي حد قلبه عليك زيهم. 
 

بلاش تتحكم فيها وتشخط وتنطر وتحسسها أنها سجينة في بيتك عشان تحس برجولتك لأنها هتعمل اللي هي عاوزاه برضو بس من وراك وبكده هتبقى في نظرها ولا شيئ لأنك مغفل وصوت عالي وبس بدون عقل. 
 

احتويها وحبها وخاف عليها بدل ما بتتحكم فيها هي أختك مش عبيده عندك .. طول ما هي لاقيه الحب والحنيه والاحتواء والخوف عليها في بيتها عمرها ما هتدور عليه بره.
 

انا ماليش غير سما وجنا وعندي استعداد أضحي بعمري وحياتي كلها من اجلهم.
 

الدنيا مش مستهله نعذب ونعاند في بعض ونكره بعض.. إحنا في رحله وهنمشي منها، خلوها رحله كويسة وحاولوا تنبسطوا وتفرحوا وتحبوا بعض فيها".