بقلم: توماس بشاي
بدأت حروف الكلام تتكتب عل الورق
بسم الاله . بسم الوطن اللي اتسرق
بسم الاله مش بسم تاجك و الدهب و الجاه
بسم الوطن . اقف انتباه
يا صاحب الحرب السلام .. منع الكلام
لزق التهم في الابرئاء و فضهرهم لازق انحناء
يا صاحب كوكتيل العذاب في محل المواطن
يا ممشي كل الناس جوه في الحيطة
و الخرس ديما هما .. بيعملوا الظيطه
يا صاحب الشركات و العقارات و الصفقات
يا نمس يا مقلب يا حرامي يا مبروم
يا صاحب الاحسان و الدفع من جيبك
واخد المليار . و ربعنا مخروم
يا مدلع المصري اهو هو دا عيبك
عيبك خلاص بان .. .. و اتكسر نابك
بصرخه الشبان .. .. الكل اهوا سابك
و احنا بنينا ميدان .. .. و سجنا احبابك
جاوب علي قد السوال
اسمك و سنك و عنوانك ؟
