المرض النفسي.. الصديق المقرّب للمبدعين

جرت العادة إن الناس تفتكر إنه الشخص إللي عنده مرض نفسي هو شخص مجنون، أو محتاج يتحجز في مصحة، أو إنه خطر على الناس مثلا. وبنشوف في بعض التعليقات على السوشيال ميديا كلمة “ده مريض نفسي” بتتقال بسخرية واستهزاء كوصم للشخص المريض نفسيًا، ده غير إنه فيه ناس فاكرة إنها مش المفروض ترتبط أو تتجوز من شخص بيعاني من اضطراب نفسي. علشان كل الأفكار السلبية دي بنلاقي المجتمع في الغرب بيتعامل مع المرض النفسي بشكل أكثر انفتاحًا علشان يقلل الوصم المجتمعي إللي بيحس بيه المرضى النفسيين من الآخرين (إللي هما شخصيًا ممكن يكون عندهم اضطرايات برضه). بنلاقي المواقع النفسية برة والمواقع الفنية وحتى ويكيبيديا عاملة رصد لكل المشاهير إللي عندهم أمراض نفسية وبنلاقيهم بيتكموا عن ده مع المجلات والبرامج التلفزيونية بكل أريحية، على عكس الشرق الأوسط والعالم العربي إللي صعب جدًا تلاقي فيه فنان فيه بيتكلم عن مرضه النفسي.

فيه نقطة مهمة جدًا نحب نتعرض لها الأول: ليه المشاهير والمبدعين بوجه عام زي الممثلين والإعلاميين والكتاب والرسامين بيكونوا معرضين للإصابة بالأمراض النفسية أكتر من غيرهم؟

ميشال رينو المتخصص في الأمراض النفسية والإدمان بيقول إنه الفنانين عامًة من أكتر الناس المعرضين للإصابة بالأمراض النفسية لإنهم شخصيات حساسة، بيكون وقع المشاعر عندهم أقوى من غيرهم. رينو بيضيف كمان إنه جزء من الأسباب إللي بتسبب لهم الأمراض النفسية تعاطي المخدرات والسلوك الإدماني إللي ناس كتير من المبدعين بيشوفوا إنه مفيد في العملية الإبداعية.

فيكرام باتيل، مدير مركز الصحة النفسية “غلوبال مانتال هيلث” بيقول إنه دراسات سابقة بينت وجود صلة بين المواهب الإبداعية والاضطرابات النفسية، رغم إنه السبب لسة مش متأكدين منه وبيقول كمان إن التفاعلات الدماغية المسؤولة عن الإبداع هي نفسها التي بتكون ساعات سبب للإضطراب النفسي، وبالتالي فإن الابداع ممكن يزود مخاطر الإصابة بمرض نفسي.

فلو إنت شخصية حساسة وبتشتغل في شغلانة ليها علاقة مباشرة بالفن والإبداع لازم تركز شوية مع المود الإكتئابي إللي ممكن يزورك بين فترة والتانية واحساسك إنك محتاج تعمل طقوس معينة أو تدخن أو تتعاطى مادة معينة علشان تعرف تركز وتبدع، لازم تكون أكثر وعيًا بطبيعة شخصيتك علشان ما تبقاش فريسة سهلة في أي مرض نفسي ولو حسيت بأعراض بتمنعك من ممارسة حياتك بشكل طبيعي لازم تستشير الطبيب النفسي.

دلوقتي هنستعرض ليكم مجموعة من الأمراض النفسية المشهورة وسط المشاهير الأجانب وإللي بتصيب عدد كبير من العاملين في المجال الإبداعي، إللي قدروا يواجهوا العالم كله بمرضهم النفسي، ما اتكسفوش منه وما اتعاملوش معاه كوصمة عار، وساعدوا بتصريحاتهم ناس كتير يفهموا إنه المرض النفسي زي أي مرض ممكن نعيش معاه حياة سليمة طالما ماشيين في سكة العلاج وبنتعالج وممكن كمان نخف منه. بس مفيش مريض بيخف غير لما بيعترف إنه مريض ومحتاج مساعدة وبيواجه مرضه بشجاعة.

الوسواس القهري Obsessive Compulsive Disorder
هو نوع من الاضطرابات المرتبطة بالقلق Anxiety بيتميز بإنه الشخص بيجيله أفكار معينة وسواسية بتسيطر عليه وبيحس بالقلق والتوتر طول ما هو مش بيعملها وساعات كتير الشخص بيعرف إنها أفكار غير منطقية وبيحاول السيطرة عليها أو التقليل منها ولكن ده بيصيبه بالتوتر الشديد وممكن يدخله في حالة من الاكتئاب.

من الفنانين إللي بيحاربوا الوسواس القهري الممثلة تشارلز ثيرون إللي قالت في حوار ليها مع ديلي ميل البريطانية إنها عندها مشكلة في تريب الدولاب ورص محتوياته لدرجة إنها كل شوية بتقوم من النوم تفتح الدولاب تطمن إنه مرصوص كويس.

أما ليوناردو دي كابريو فعنده وسواس من المشي على الرصيف المتسخ وكان زمان ممكن يمشي طريق تاني طويل لمجرد إنه ما يدوسش على لبانة مضايقاه عل الرصيف!

الممثلة كاميرون دياز بقى بتمشي تمسح أوكر الأبواب كلها حتى في بيتها، وساعات بتفتح الأبواب بكوعها علشان ما تلمسش أوكرة الباب لأنها مليانة جراثيم.

ديفيد بيكيهام بقى مهووس بالسيميترية في كل حاجة.. يعني مثلا لازم يرتب تيشيرتاته في الدواليب حسب لونها ولازم يرص الحاجة في التلاجة بشكل معين ولازم الحاجة يكون ليها عدد معين وممكن يرمي كانز المشروب الغازي خالص لمجرد إنه زيادة عن العدد إللي عايزه في البيت!

الاكتئاب Depression
واحد من أكثر الأمراض النفسية حول العالم، عادة الأشخاض إللي عندهم اكتئاب مش بيقدروا يمارسوا حياتهم اليومية بشكل طبيعي وبيفقدوا الرغبة والحماس في عمل الحاجات إللي بيحبوها. الاكتئاب بيرتبط عادة بمشاكل تانية زي القلق النفسي Anxiety والافراط في التفكير Overthinking ومشاكل في النوم والشهية.

من قصص الاكتئاب المحزنة قصة المغنية ليدي جاجا إللي أعلنت في حفل توزيع الأوسكار 2016 إنها تعرضت للاغتصاب وهي صغيرة وإنه الموضوع أثر في نفسيتها جدًا وكان عامل من عوامل اصابتها بالاكتئاب.. اتكلمت كمان عن آلام العظام المستمرة إللي دفعتها لتدخين الماريجوانا في البداية علشان تتخلص من الألم لحد ما تحولت لمدمنة.. جاجا دايمًا بتعلن بحزن إنه نفسها تخف وتتخلص من الإدمان.

كمان كلنا بنلاحظ إنه أنجلينا جولي في صورها وحواراتها كتير بتكون مكتأبة لدرجة إنه مرض الإكتئاب وصلها مؤخرًا لفقران الشهية المرضي Anorexia Nervosa وإللي خلاها تفقد وزن كتير قوي لحد ما وصلت لـ 40 كجم وكانت حياتها مهدةة بالخطر! ما ننساش كمان معاناتها النفسية من خوفها من الإصابة بالسرطان بسبب تقارير الأطباء إللي قالوا لها إنها مهددة بشدة للإصابة بيه لدرجة إنها عملت عملية صعبة خوفًا من الإصابة بالسرطان.

ميل جيبسون بعد ما مثل فيلم The beaver سنة 2011 إللي بتدور أحداثه حوالين شخص مكتئب أصيب بالاكتئاب فعلًا، وده الجزء إللي اتكلمنا عنه في المقدمة وإنه ساعات الإبداع والتقمص إللي بيعمله الفنانين والمبدعين بيدخلهم فعلا في أمراض نفسية. علشان كدة ساعات بيكون التأهيل النفسي للمبدعين وزيارة الطبيب النفسي حاجة وقائية لازم تتعمل.

وأخيرًا هنتكلم عن جيم كاري.. إللي بيثبتلنا بالدليل القاطع إنه الكوميديين والضاحكين أغلب الوقت ممكن جدًا يكون عندهم اكتئاب وإنه مريض الاكتئاب مش شخص بيعيط ومنكوش ومبهدل طول الوقت زي مالناس بتظن.

اضطراب ثنائي القطب Bi polar
ممكن نلخص مرض اضطرب ثنائي القطب بإنه عبارة عن عدم اتزان في المزاج. من التفاؤل الشديد والسعادة والثقة بالنفس والنشوة لمرحلة عنيفة من الاكتئاب والحزن ممكن يوصل لرغبة في إنهاء الحياة. المرض ده بيسجل حالات انتحار عالية بين المصابين بيه. وعلى الرغم من كدة، إلا إنه علاجه بيسمح للمريض إنه يعيش حياة طبيعية تمامًا.

من أشهر الفنانين إللي بيتكلموا عن معاناتهم مع اضطراب ثنائي القطب وتوابعه، المطربة الاسترالية سيا وإللي بترّجح إصابتها بيه بسبب تدخين الماريجوانا كطفلة لسنين طويلة، وبسبب وجود تاريخ من المرض النفسي في عيلتها. سيا حاولت الإنتحار وعندها رُهاب إجتماعي وما بتحبش تظهر بشكلها إلا نادرًا وبتعافر بقالها سنين علشان تخف وزي ما إحنا شايفيين أمراضها النفسية ما منعتهاش من الارتباط والنجاح في عملها وحياتها.

جان كلود فان دام كان من الفنانين الشجعان إللي صرح كمان باصابته باضطراب ثنائي القطب من 13 سنة وأكد على أهمية العلاج وإنه ملتزم بالدوا بتاعه.

النهام العصابي Bulimia Nervosa
هو نوع أنواع اضطرابات الأكل بيصيب عادة السيدات. المصابين بالنهام بيميلوا لتناول كميات كبيرة جدًا من الطعام في أوقات قصيرة متقاربة وبعدين بيحاولوا يتخلصوا منها بكل الطرق زي تناول الأدولة المليّنة أو ممارسة الرياضة بشكل مفرط أو حتى التقيؤ. على المدى البعيد المرض ده بيدخل الشخص في الاكتئاب وبيسبب مشاكل صحية كتير ممكن توصل للوفاة.

من الفنانين إللي عندهم بوليميا الممثل راسل براند وميلاني سي عضورة فريق سبايس جيرلز والأميرة ديانا ومغنية سبايس جيرلز جيري هاليويل والمطرب التون جون والمطربة بريتني سبيرز. ولو تلاحظوا صور الفنانيين دول كلهم هتلاقوها دايمًا مختلفة ما بين نحافة شديدة وجسم ممتلئ.. وكتيرهتلاقوا شكلهم مجهد ومش صحي.
نقلا عن شيزلونج