متسبش حقك

 

حقك في النزول إلى الانتخابات وتقول كلمتك.

 

متسبش حقك في بناء دولة القانون والمؤسسات.

 

متسبش حقك وحق أولادك في حياة كريمة، وزي ما بيقول المثل راح الكتير ومش باقي اإا القليل.

 

احنا فعلا تعبنا الأيام اللي فاتت.. من 2011 مرت مصر بأيام صعبة وده طبيعي لحالة الانفلات والتدهور اللي كنا فيها.

 

ولكن دلوقتي مش من حقك متنزلش، ولكن انزل واعطي صوتك لمن يستحق وقول رأيك.. رأيك امانة لازم تؤديها لأن الدستور والقانون أعطاك هذه الأمانة ولازم تصونها ومتخونهاش.

 

قالها القائد متسبش حقك وانزل حتي لو هتقول لا عاوزين ننزل زي ما نزلنا في 30 يونيو فاكرين ولا نسيتوا أكيد فاكرين.. نزلنا بالملايين وقلنا كلمتنا.

 

انزل قول كلمتك وادعم بلدك علشان كلمتك تدعم مؤسسات بلدك اللي اتهزت من الآثار العنيفة لـ 25 يناير وثورة 30 يونيو.

 

يا شباب مصر العظيم أنتم الأمل.. أنتم القطاع الأعظم والأكبر من السكان وعليكم مسؤولية ألا تسمحوا لأحد ما أن ينال من بلدكم.

 

ونحن أقوياء بكم وبالمصريين جميعًا وإصراركم على النهوض ببلدكم. متسبش حقك في إنك تنزل تنتخب لأن صوتك هو اللي هيحمي البلد ويقوي مؤسساتها وأمنها القومي.

 

متسبش حقك في الانتخابات علشان نعرف نجيب حق الشهداء اللي ضحوا بدمهم علشاني وعلشانك.

 

متسبش حقك علشان نواجه أنا وأنت وكل مصر المؤامرات اللي بيدبروها لإسقاط بلدك.

 

متسبش حقك في إنك تنزل تدلي بصوتك ومتكسلش وتقول هنزل تاني يوم أو تالت يوم، وتكتشف إنك مرحتش وحقك ضاع منك.

 

متسبش حقك وخد ولادك ادلي بصوتك واتصوروا.. وانشر صورك وافرح وانت بترفع إيدك وفيها حبر الانتخابات.

 

متسبش حقك يا جدع أنت أولى بصوتك بدل ما يضيع وتقول ياريت اللي جرى ما كان، وخد بالك اللي جرى ما كان، أنا قصدي إن ضميرك يؤنبك إنك ما شاركتش وفرحت.

 

متسبش حقك علشان ميتقالش عليك سلبي، وبلاش نقول الجملة اللي بكرهها وأنت لازم تكرهها اللي هي ياكش تولع وميصحش علشان انت مسؤول قدام بلدك ووطنك وبيتك وأسرتك.

 

انزل ومتسبش حقك في إنك تقول كلمتك.. وخد بالك صوتك هيفرق ومتقولش هي جت عليا أنا.. أيوة يا سيدي جت عليك انت.. هو أنت مش مواطن ولك حقوق وعليك واجبات.. قوم بالواجب علشان تاخد حقك وانزل قول كلمتك.

 

انزل علشان نفرح ونقول إحنا مسبناش حقنا..