بالفيديو.. شاب يعذب "كلبه" وجمعية حماية بالحيوان تحرر محضر رسمي ضده

في سلسلة لا متناهية من قصص تعذيب الحيوانات، نشر أحد العاملين بجمعية حماية الحيوان، فيديو لمراهق يقوم بتعذيب كلبه وركله وإلقاءه على الأرض مرات عديدة وغيرها من أساليب التعذيب وسط صراخ الكلب.
 

وأوضح عبده في تدوينة عبر حسابه بالفيسبوك، "في ناس أكيد شافت الفيديو ده و في ناس مشافتوش، المهم دة ولد عنده حوالي ١٦ سنه في الثانوية زي ما أنتوا شايفين انه شكله سادي ومريض وخطر مش علي كلبه و بس ده خطر علي المجتمع، الواقعة في إسكندرية كلاكيت تالت مره.
 

لما اتبلغنا بالجريمه ده أتحرك الشباب المحترمة المهندس مصطفي و أستاذ مهند و قابلوا والد الولد ده و فرجوه غلي فيديوهات ابنه و ده اول فيديو في عندنا اتنين تانين الراجل أتصدم و أقر ان بكده يبقي ابنه سادي و تعهد انه هايدي الكلب لحد و علي ما يحصل كده مش هايخلي الكلب مع ابنه لوحدهم ابدا و الكلب قاعد اصلا في الشقه و لما نزل بيعرج ابنه قاله انه اتخبط في سيخ حديد و هو طبعا فضل يهبد فيه زي الفيديو كده.
 

المهم فضلنا متابعين طبعًا لاكتر من أسبوع و عرفنا إن الكلب لسه موجود و مفيش ضمانات لسلامه وأمان الكلب، اتحركنا لإسكندرية وقابلنا الشباب المحترمة اللي اتشرفت بيهم و أخدونا علي العنوان وكلمنا والد الولد من تيليفون البواب، المهندس مصطفي كلمه وعرفه بيا واداني التليفون. 
 

ايوه يافندم معاك عبدو جو رئيس مجلس إدارة الجمعية المصرية لإنقاذ الحيوان.
 

اهلًا وسهلا 

ممكن نقابل حضرتك علشان تطمنا علي الكلب بما إننا اخترنا الحل السلمي لما الشباب قابلوا حضرتك. 
 

لا يا فندم اطمن

انا: مش معني انك بتقولي اطمن يبقي هاطمن، انا موافق متاخدش إجراءات رسميه علشان اطمن بنفسي علي الكلب. 
 

هو اتفضل حضرتك خد الإجراءات المطلوبة

أنا: تمام شكرًا لحضرتك 
 

احنا مكناش عايزين نضيع مستقبل الولد زي ما كان هايحصل مع احمد اللي كان متصور فيديو بيضرب الكلب سيمبا في إمبابه اللي أنقذناه وأتحول أحداث و اتدخلنا علشان مستقبله ميضيعش في أخر لحظة، وكنا مستعدين نتنازل في مقابل اننا نضمن سلامه الكلب، بس بما إن والد الولد مش هامه و لا سلامه الكلب و لا مستقبل ابنه احنا هانعمل المحضر الرسمي باسم الاتحاد المصري لجمعيات الرفق بالحيوان إن شاء الله.
 

مرفق بيه الفيديو وهانعمل اتصالاتنا في محيط دايره المنطقة واليوم اللي هانحدده هانعلن رقم المحضر، هانطلب منكم تعملوا محاضر تضم لمحضر الجمعية.

اللي انا طالبه منكم دلوقت تنشروا الفيديو دة علي أوسع نطاق لان انتشاره هايفيدنا في المحضر.