دقنه طايلة بطنه

- ابن وقته (وهو مستلقٍ على ظهره): أحلى حاجة فى الدنيا النوم فى الجامع.

- محمد: مش فى كل وقت يا «ابن وقته» بيه.. النبى صلى الله عليه وسلم أمر المسلمين بالاعتكاف فى العشر الأواخر من رمضان بس!.. ورمضان بَرم خلاص!.

- ابن وقته: بَرم بسببكم.. عمالين تعدوا فى أيامه لغاية ما عفرتوه.. (وهو يقوم متمطعاً): حاجة آخر أبهة.. الواحد قايم نايم أدام التكييف.. مش حاسس بجهنم الحمرا اللى بره.

- محمد: انت ما عندكش تكييف فى البيت يا صيام بيه؟!.

- ابن وقته: طبعاً عندى.. بس ما بشغلوش.. فواتير الكهربا بتلسوع.. أنا فاصل التكييفات ومخليهم يشغلوا المراوح.. (ضاحكاً): زمانهم بيشروا عرق دلوقتى.

- محمد: فاتورة كهربة الجامع بقت فظيعة.. كل شهر بتزيد.

- ابن وقته: لِم من المسلمين.. ولا هيعبدوا ربنا ببلاش؟!.

- محمد: مش كله بيدفع!.

- ابن وقته: اللى ما يدفعش ما يدخلش!.

- سامى (ضاحكاً): يعنى هنمنع الناس عن بيت ربنا؟!.

- ابن وقته: نمنعهم.. كل حاجة دلوقتى بالفلوس.. وبعدين ما همّا بيدفعوا فى العمرة والحج فلوس أد كده.. ما يدفعوش فى الصلاة ليه؟.. الصلاة عماد الدين.. من هنا ورايح أى مسلم يخش يدفع.. يا سلام.. واضح إن التكييف دا لسه بخيره.

- محمد: دا راكب من شهرين.. اتبرع بيه واحد من أهل الحى بيشتغل فى الخليج.

- ابن وقته: طيب ما تكلموه على موضوع فواتير الكهربا.. جايز يخصص لنا موازنة تشغيل.. إحنا بنعمل كده فى الحكومة.

- محمد: سافر.

- ابن وقته: يا خسارة.. عيبكم إنكم ما بتفكروش.. كل تركيزكم فى المشكلة.. إنما تفكروا فى حل لأ.. شعب واطى.

- سامى: لا حول ولا قوة إلا بالله.

- ابن وقته: بتحوقل فى وشى يا واطى.

- سامى: ما أقصدش يا «ابن وقته» بيه.

- ابن وقته: مين الناس اللى ممددة هناك دول؟!.

- محمد: مسلمين معتكفين زينا.

- ابن وقته: وطبعاً بيفطروا ويتسحروا على حساب الجامع!.

- محمد: فيه ناس منهم بتدفع!.

- ابن وقته: كله لازم يدفع.. أتارى الجامع مزحوم.

- محمد: اللى نايمين الناحية التانية دول تبع الشيخ عماد.

- ابن وقته: وطبعاً قاعدين بلطجة.. مش تبع الشيخ عماد؟!.

- سامى: بالعكس.. دا جه النهارده وادانا 500 جنيه!.

- ابن وقته: بجد.. والله الجدع دا ابن حلال.. مشكلته إنه عصبى شوية.. بس إيده فرطة.. شوف الشباب اللى تبعه.. عيال زى الورد.. كل واحد فيهم دقنه طايلة بطنه.. حاكم المسلم طول ما يتقى ربنا تلاقى دقنه بتطول أكتر وأكتر.

- ضابط شرطة (يظهر فجأة): اثبت مكانك منك له.. (إلى مجموعة من العساكر يقفون حوله): لموا لى العيال دى.

- ابن وقته: فى إيه يا باشا؟.. إحنا مقيلين شوية فى الجامع.

- الضابط (وهو يشير إلى مجموعة الشيخ عماد): تعرف العيال دول؟!.

- ابن وقته: دول شباب طيب.. دقنهم طايلة بطنهم.. تبع الراجل الطيب الشيخ عماد.

- الضابط: دول عيال إرهابيين.

- ابن وقته: يا نهار أسود.. امسكهم.. امسكهم يا باشا قبل ما يفجروا الجامع.. شدهم من دقنهم اللى طايلة بطنهم ولاد التيت.

- الضابط: وانت كمان تعالى معاهم.

- ابن وقته (باندهاش): أنا؟!.. ليه يا باشا.. دا أنا حتى ماليش دقن خالص!.

- الضابط: هاتوه من قفاه.
نقلا عن الوطن