بقلم: أرشف فايز

الدنيا مطر ...الدنيا خطر
من عند امريكا ..لحّد قّطّر
ولا فيه إحساس
لمصير الناس
وسواس خناس
لقلوبنا عّبّر
الدنيا مطر
..........................
الدنيا رعود ... وطريق مسدود
وبقينا عبيد ... عبد الموجود
وادي الملايين
قايمين قاعدين
طب إمتى وفين ؟
دا ملوهشي أثر
الدنيا مطر
.......
الدنيا خريف ... مليانه بزيف
أفعال ناقصه ... مالهاش تصريف
والماضي دا كان
في تاريخ إعلان
وف أعلى مكان
وكتبنا خبر
الدنيا مطر
.....
الدنيا رياح ... طب مين مرتاح
والحزن بياكل ف الأفراح
ولا عادشي دليل
لخطاوي الليل
لافيه نجمه تميل
على خد قمر
والدنيا مطر
.............
الدنيا ميدان ... جوه الأحضان
أحبابه سابوه ... أصبح بردان
والبرد شديد
والشمس بعيد
وهلال العيد
دا زمانه جبر
الدنيا مطر
.............
الدنيا عروش ... سلاطين وجيوش
دا قليل أصلي ... وكتير مغشوش
وياسلطان قوم
طب صح النوم
جاتلك ازاي
لو كات بتدوم
ما تفوق يابشر
الدنيا مطر

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :