بقلم: زكريا رمزى زكى 
لا أعرفه ولم أتقابل معه ولا أعرف شكله لأنه يضع علم مصر على صفحته فى موقع الفيس بوك حدثنى على الشات يوما وهو مهموم بوطنه لأنه من الشباب الذى يحب هذا الوطن ولا يرضى له الا أن يكون فى مكانته المناسبة فنقلت لكم الحديث كما هو
هو : مساء الخير
أنا : مساء النور
هو : سوري لازعاجك هعطلك عن حاجه
أنا : اتفضل
هو : ابدا انا كنت عايز اتناقش معاك في اللي بيحصل في البلد
انا شايف انك شخص محترم وعقلك متفتح
اولا انا شاب مسلم
أنا : اخى
هو : وزعلان جدا علي البلد واللي بيحصل فيها
أنا : أنا زيك واللى بيحب البلد حاله كده كلنا
هو : طب انت شايف معايا اننا مشيين في طريق الفتنه؟

أنا : الفتنة بينها وبيننا خط رفيع نسير عليه
بس العقلاء اللى زيك هما امل مصر من هذا المصير بس هناك من ينفخ فى النار حسالك سؤال انت مع مقاطعة موبينيل
هو : الموضوع لما بيمس الدين بيبقي صعب جدا سواء المسيحيه او الاسلام
أنا : انا معاك
هو : بحلم باقتصاد قوي
بحلم بوحده وطنيه
بحلم ببلدي احسن بلد
بجد والله ده مش كلام
وانا هجاوبك بصراحه واقولك اه انا مع المقاطعه
مع اني متاكد ان الملطوب اننا لا نقاطع
وعلي فكره انا كنت من ضمن الشباب اللي بتحاول تطفي كنيسه امبابه
أنا : بس فيه ناس بتنفخ فى النار وتستغل لصالح شركات اخرى
هو : واحنا بنساعد صح؟
أنا : ساويروس غلطان لكن ماذنب الاقتصاد والموظفين عنده
انا صعبان على الموظفين
هو : مش بتكلم علي ده انا بتكلم بشكل عام
لالالا انا اقصد اننا زي ماتقول مجبرين علي طريق مرسوم
أنا : ممكن لكن اعتقد انها رياح غريبة هبت علينا فغيرت من هويتنا
هو : تمااااااااااااااااااام بجد كلام من الاخر طب الحل؟
أنا : نتمسك بمصريتنا ونحافظ عليها
هو : هقولك حاجه انا شغال في شركه امريكيه اعز صديق ليا في الشركه راجل مسيحي
بجد بحترمه وبعزه جدا جدا جدا
أنا : اوعى تفتكر انا لما بدافع عن موبينيل بدافع عن ساويروس انا بدافع عن مصر
طبعا لو تخلينا عن الحساسية فى المعاملة مع بعضنا سنصبح اكثر من الاخوة
هو : طب نتفق علي حاجه
ان الفتره اللي فاتت اتصرفت غلط وانا معترف
وانت اتصرفت غلط؟
ونبص للى جاى
يعني اي غلط حصل من اي حد هنحاول نصلحه؟
المفروض يبقى فيه فى كل حى لجنة حكماء
من الجانبين
أنا : تمام كده
المفروض يبقى فيه فى كل حى لجنة حكماء
من الجانبين تشوف فيه ايه بين الناس متستناش المشكلة لما توقع
هو : طب عندك حل؟
أنا : ممكن على فكرة فى الحى بتاعك تعمل لجنة من الشباب المسيحى والمسلم تجتمع كل جمعة مثلا مرة فى الكنيسة ومرة فى الجامع
مهمتكم توأدوا أى مشكلة
هو : برااااااااااااااااااااااااااااااااااااااااااااااااافو بجد فكره تمام
أنا : ناقشوا متطلبات الحى لما يبقا فيه تعاون مش حيبقى فيه فتنة
هو : خلاص انا هبدا مع صحابي مش في منطقتي وبس
انا هعملها حمله علي مستوي عالي
أنا : بجد روح الكنيسة وقابل المسئول وهو حيدلك على شباب مسيحى واعملوا ائتلاف المستقبل الان للشباب
والكلمة لهم
هو : تمام خلاص انا هبدا واتابعك
وزي ماقولتلك هعاهدك اني احاول انهي علي اي نار ممكن تولع البلد
أنا : ربنا يساعدك واكيد حيوفقك بجد لانك بتحب بلدك وربنا يكتر من امثالك

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :