همة بيلعبوا ... واحنا بنهزر

باسمه وليم – أسيوط
+ مبروك ما سجله التاريخ لفريق فرنسا كاس مونديال كرة القدم "روسيا 2.18 " مبروك لدولة كرواتيا فريقها ورئيستها التى اذهلت العالم فى مونديال العجائب "روسيا 2.18 "وكسبت ارقام لعالميتها بجانب ارقامها الكروية .. ومبروك لفريق اليابان وما سجله التاريخ عن فريقها كلمة صغنتوتة بداخل غرف اقامة اللاعبين بعد تنظيفها " عبارة ألف شكر "على الاستضافة ،، منتهى الذوق والرقى ياأخى!!  .. ومبروك .. مبروك .. مبروك .. العالم ينطلق فى ركب التقدم والرفعة .. ونحن نزحف او نتقهقرالى عصر ماقبل الحضارات .. هارد لك يا مصر اللى علق فريقها الدولى شماعة مهزلته الكروية وهزيمته المدويه على عنق المدرب الارجنتينى هيكتور كوبر وخططه الكروية والدفاعية فتم ذبحه والقى به خارج الديار المصرية .. وبس خلاص توته .. توتة خلصت الحدودته .. حلوة ولا ملتوته .. وخمسه وخميسه ! ويا ناس يا شر كفاية قر .. وما تبصش علىّ بعين ردية  .. بص للى مدفوع فيه ؟!

 وعلشان التاجر لما بيفلس .. بيدور فى دفاتره القديمه .. نلاقى انه اعلن على مواقع التواصل الاجتماعى لما كان فريقنا الوطنى على ارض روسيا وقبل ما تخلص الزفة – انه تكونت لجنة للتحقيق فى جوانب خروج المنتخب الوطنى من كاس العالم وان التحقيق فى  هذا الامر سيتم علانية وعلى ثلاث جوانب تبتدى من مصر الى روسيا الى الشيشان ومنها الى ملاعب بطرسبرج .. اقصد جوانب فنية وادارية واخرى خاصة بالمشجعين المصريين للمنتخب .. بل ذكرت مصادر وقتئذ بان التحقيقات ستتم مع ادارة بعثة المنتخب الوطنى والتى كانت مسئولة عن اقامة المنتخب فى الفندق ومعسكر التدريب ..  اضافة الى التحقيق فى  التقاط  صور مع اللاعب محمد صلاح نجم المنتخب الوطنى فى الملعب .. وقيل انة ستشمل التحقيقات ايضا الجوانب الادارية وكيفية سفركوكبة  الفنانين ونوابنا الكرام اعضاء مجلس الشعب وذلك لتشجيع المنتخب ( السوبر ستار ) وهل تم ذلك على نفقة الدولة من "الحم الحى "وما ترتب علية من اهدار المال العام ام على نفقتهم الخاصة ام هل هناك شركات قطاع اعمال عام او ما شابه ،، تبنت الامر .. وبدلا من ان تغدق العطاء على مساكين وفقراء الشعب .. تكفلت بتحمل نفقات سفر كوكبة الفنانين علشان يقيموا الصلاة كان مافيش مساجد للصلاة فيها فى مصر .. ام الافضل (السكتم بكتم ) يا هوووه .. احنا الشعب مش عارفين ايه اللى حصل بالضبط .. حد يتبرع ويفهمنا  ..

+ وعلشان شر البليه ما يضحك .. ماذا عن الواد اللى كان بيهزر فى الملاعب الدولية ، ومونديال كرة القدم .. يا رب كلامنا يكون خفيف الظل عليه .. مش شايف ان عيون كاميرات العالم بتحملق فى كل صغيرة وكبيرة ومن ضمن ما كتب على مواقع التواصل الاجتماعى .. قالوا ايه بالنص : ان المنتخب سيفجر مفاجأة فى واقعة اللاعبين سعد سمير وكهربا وان هناك ثلاث عقوبات تنتظر سعد سمير بعد واقعة الفعل الفاضح فى روسيا اذ سادت حالة من الغضب داخل مجلس اتحاد لكرة بسبب الفعل الفاضح الذى ارتكبه سعد سمير تجاه احد زملاؤه فى اثناء تدريب المنتخب فى روسيا 2.18 ويدرس الاتحاد – فى وقته – توقيع عدد من العقوبات على اللاعب بسبب هزاره فى الملاعب – وبس خلاص –

 اما النكته اللى قبل الاخيرة .. اتفرج يا صاحبى .. وعلشان الـ v /c   بتاع المحروسه اما مسلم او مسيحى ودة ( بيت الداء ) ويكفى هذا وخلصت كدة -اطل علينا من نوافذ روسيا 2.18 الفنان القدير متعدد المواهب .. رسام بروتيرهات المنتخب اللى رايح يعرض ما انتجه وابدعه وما تفتق بة ذهنة وسط المنتخبات الكروية الدولية .. فى الوقت الذى تعانى فيه ملاعب اندية بلده من الاضهاد الكروى .. هل هذا الفنان يعرف بداية يعنى ايه فن قبطى  !  ..  أوماذا نعنى بالايقونات القبطية وتاريخها هل فيه جامعة فيك يا مصر بتحفز الشباب وتفتح ابوابها لمثل هذه الدراسات ورموزها ودلالاتها الفنية والروحية ..  وللا بتتسارع فى نفس الفنان المخضرم ذو الموهبة الفذة الرغبة فى مزيد من شهوة الشهرة لينتهك حرمة الصور القديسين ويصور وجه كوبر على صورة السيد المسيح .. والاغرب من ذلك ( التبرير الفاضح ) – وده بيت الداء – القول بان الفن القبطى كان يتلآلآ فى بورتيرهات اللاعبين فى المونديال .. يا للحماقة ما لقيش غير الفن القبطى الاصيل ويلعب بيه؟! طب ما تستخدم البورتيرهات على وجوه ملوك وملكات الفراعنة "القناع الفرعونى "علشان تناسب مقاس فريق الفراعنة ولا ايه يا كتكوت ؟!!

+ واتفرج وشوف الضحك الهيستيرى لمجدى ععبد الغنى بعد خسارة فريق مصر امام روسيا .. اما يعلمنا احد ما سبب هذا الضحك بعد ما عاد الفريق الوطنى الى ارض مصر بسلامة الله ..

+ وعلشان كان مولد وصاحبه غايب .. وخرجنا منه بلا حمص وكل شيئ انكشف وبان .. نقول النكته الاخيرة اللى تداولتها ايضا مواقع التواصل الاجتماعى .. قالت ايه ؟ فجر عبد الناصر زيدان مفاجئة المونديال مصر / روسيا 2.18 عن زوجات وابناء بعثة المنتخب اذ اكد الاعلامى ان ادارة بعثة المنتخب الوطنى فى روسيا سمحت لزوجات بعض اللاعبين بالاقامة معهم فى الفندق مشددا على ضرورة محاكمة مدير المنتخب لارتكابه كوارث - على حد تعبيره - فى حق فريق الفراعنة .. واضاف بان مدير المنتخب كان يصطحب معه زوجته وابناؤه فى فندق اقامة الفراعنة .. بالاضافة الى آخرين كانوا متواجدين فى فندق المنتخب .. واكد – والعهدة على الراوى – ان مدرب حراس مرمى المنتخب الوطنى اصطحب ابناؤه الى غرف لاعبى المنتخب من اجل التقاط الصور التذكارية معهم وعدد اخر من اللاعبين اقاموا مع زوجاتهم فى غرفهم ليلة مباراة  المنتخب الوطنى .. ؟!

بقى احنا يا ولاد مصر .. كنا بنشرب الساقع فى الكافيهات مع ساندوتش الفول الحراتى باربعون جنيها ونستحمل درجات الحرارة القاسية بعد يوم عمل طويل وشاق ونترمى على المقاعد من التعب والزحام وانتم بتهزروا .. آه يا مصر وصندوق تحيا مصر ..